ភ្នំពេញ ៖ កម្ពុជាប្រកាសបង្កើនវិភាគទានរបស់ខ្លួនពីចំនួន ៣សែន ១ម៉ឺន ៥ពាន់ដុល្លារអាមេរិក ឱ្យឡើងដល់ ៤សែន ៥ម៉ឺនដុល្លារអាមេរិកសម្រាប់គាំទ្រប្រតិបត្តិការរយៈពេល ៣ឆ្នាំទៅមុខរបស់មូលនិធិអន្តរជាតិសម្រាប់អភិវឌ្ឍន៍កសិកម្មចាប់ពីឆ្នាំ២០១៩-២០២១។
លោកបណ្ឌិតសភាចារ្យ អូន ព័ន្ធមុនីរ័ត្ន ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានដឹកនាំគណៈប្រតិភូជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ និងក្រសួងកសិកម្ម រុក្ខាប្រមាញ់ និងនេសាទ ចូលរួមកិច្ចប្រជុំក្រុមប្រឹក្សា ទេសាភិបាលលើកទី៤១ ប្រចាំឆ្នាំ២០១៨ របស់មូលនិធិអន្តរជាតិសម្រាប់អភិវឌ្ឍន៍កសិកម្ម ដែលបានប្រព្រឹត្តធ្វើចាប់ពីថ្ងៃទី ១២-១៤ ខែកុម្ភៈ ឆ្នាំ២០១៨ នៅទីស្នាក់ការកណ្តាលនាទីក្រុងរ៉ូម ប្រទេសអ៊ីតាលី ដោយក្នុង កិច្ចប្រជុំនេះ ខាងកម្ពុជាបានបញ្ជាក់អំពីជំហរគាំទ្ររបស់ខ្លួនចំពោះប្រសិទ្ធភាពនៃហិរញ្ញប្បទានសហប្រតិបត្តិការកន្លងមករបស់ស្ថាប័ននេះ និងទិសដៅការងារជាយុទ្ធសាស្ត្រដែលមូល និធិអន្តរជាតិសម្រាប់អភិវឌ្ឍន៍កសិកម្មត្រូវប្រកាន់យក សម្រាប់រយៈពេលមធ្យមទៅមុខ ២០១៩-២០២១ ជាពិសេសឯកឧត្តមបណ្ឌិតសភាចារ្យបានប្រកាសពីការបង្កើនវិភាគទានរបស់កម្ពុជាពីចំនួន ៣សែន ១ម៉ឺន ៥ពាន់ដុល្លារអាមេរិក ឱ្យឡើងដល់ ៤សែន ៥ម៉ឺនដុល្លារ អាមេរិកសម្រាប់គាំទ្រប្រតិបត្តិការរយៈពេល ៣ឆ្នាំទៅមុខរបស់មូលនិធិអន្តរជាតិសម្រាប់ អភិវឌ្ឍន៍កសិកម្ម ចាប់ពីឆ្នាំ២០១៩-២០២១។
សូមជម្រាបជូនថា៖ កិច្ចប្រជុំប្រចាំឆ្នាំ២០១៨នេះ ធ្វើឡើងក្រោមប្រធានបទ “ចាកចេញ ពីភាពផុយស្រួយឆ្ពោះទៅកាន់ភាពធន់ និងរឹងមាំរយៈពេលវែង៖ ការវិនិយោគលើសេដ្ឋកិច្ចជនបទប្រកបដោយចិរភាព”។ ជាមួយគ្នានេះ អង្គប្រជុំក៏បានពិនិត្យវាយតម្លៃលើសមិទ្ធផល ការងារកន្លងមករបស់មូលនិធិអន្តរជាតិសម្រាប់អភិវឌ្ឍន៍កសិកម្ម និងកំណត់ទិសដៅ និង អាទិភាពការងារនៃឆ្នាំបន្ទាប់។ជាលទ្ធផលកិច្ចប្រជុំក្រុមប្រឹក្សាទេសាភិបាលប្រចាំឆ្នាំ២០១៨បានឯកភាពរួមគ្នាដាក់ចេញនូវគោលដៅនៃរបៀបវារៈការងារថ្មីសម្រាប់ ៣ ឆ្នាំទៅមុខ ចាប់ពី ឆ្នាំ ២០១៩ ដល់ ២០២១ គឺ “ភារកិច្ចរបស់មូលនិធិអន្តរជាតិសម្រាប់អភិវឌ្ឍន៍កសិកម្ម ត្រឹមឆ្នាំ២០៣០ នឹងមិនទុកចោលអ្នកណាម្នាក់ឱ្យបន្តស្ថិតក្នុងភាពក្រីក្រ” និងបានឯកភាពគ្នាបង្កើនធនធានសម្រាប់ប្រតិបត្តិការរបស់មូលនិធិអន្តរជាតិសម្រាប់អភិវឌ្ឍន៍កសិកម្ម ២០១៩-២០២១ ឱ្យដល់ ៣,៥ប៊ីលានដុល្លារអាមេរិក និងរំដោះប្រជាជនជនបទ ចាកចេញពីភាពក្រីក្រឱ្យបាន យ៉ាងតិច ១២០ លាននាក់ត្រឹមឆ្នាំ២០២១៕
