រដ្ឋាភិបាលជប៉ុន តាមរយៈស្ថានទូតជប៉ុន ប្រចាំកម្ពុជា បានឯកភាពផ្តល់ថវិកា ចំនួន ១.១៣១,៥៤៧ ដុល្លារអាមេរិក ដល់អង្គភាពចំនួន២ នៅក្នុងប្រទេសកម្ពុជា ក្រោមគម្រោងជំនួយ ឧបត្ថម្ភឥតសំណង សម្រាប់គម្រោងរបស់អង្គការក្រៅរដ្ឋាភិបាលជប៉ុន។
កិច្ចសន្យាផ្តល់ជំនួយនេះ ត្រូវបានចុះហត្ថលេខាដោយ ឯកឧត្តម ហូរីណូអ៊ុជិ ហ៊ីដេហ៊ីសា ឯកអគ្គរាជទូតវិសាមញ្ញ និងពេញសមត្ថភាព របស់ប្រទេសជប៉ុនប្រចាំកម្ពុជា និងអ្នកតំណាងមកពី អង្គភាពទទួលជំនួយទាំងពីរ ។
ឯកឧត្តម ហូរីណូ អ៊ុជិហ៊ី ដេហ៊ីសា បានមានប្រសាន៍ ក្នុងពិធីចុះហត្ថលេខានោះថា សម្រាប់ គម្រោង ផ្ទេរបច្ចេកទេសមេកានិច គ្រប់ជ្រុងជ្រោយ បោសសំអាតមីន ក្នុងខេត្តកំពង់ធំ ដែលមាន ថវិកា ចំនួន ៦៧៦, ០១៩ ដុល្លារអាមេរិក ដល់អង្គការសកម្មភាព កម្ចាត់មីនជប៉ុន (JMAS)។ គម្រោងនេះ អង្គការនឹងអភិវឌ្ឍន៍លើបច្ចេកទេសមេការនិច ក្នុងការបោសសម្អាតមីន ដោយប្រើ ម៉ាស៊ីនដោះមីន និងម៉ាស៊ីនដោះគ្រាប់បែកចង្កោម នៅក្នុងតំបន់ដែលសម្បូរទៅដោយគ្រាប់មីន និង គ្រាប់បែកចង្កោមនៅលាយជាមួយគ្នា។
ជាមួយគ្នានោះ អង្គការនេះនឹងផ្ទេរវិធីសាស្ត្របោសសម្អាត ដែលមានប្រសិទ្ធភាព និងសុវត្ថិ ភាពទៅមជ្ឈមណ្ឌល សកម្មភាពកំចាត់មីនកម្ពុជា (CMAC) ដើម្បីពង្រឹងសមត្ថភាព និងពន្លឿនកិច្ច ខិតខំប្រឹងប្រែងរបស់CMAC ដើម្បីធ្វើឱ្យប្រទេសមានសុវត្ថិភាព។
ឯកឧត្តម ឯកអគ្គរាជទូតបន្តថា ជប៉ុនបានសម្រេចផ្តល់ថវិកាចំនួន៤៥៥.៥២៨ដុល្លារអាមេរិក សម្រាប់លើកកម្ពស់សុខភាព មាតា និងទារក នៅក្នុងខេត្តតាកែវ ដល់អង្គការ World Vision Japan តាមរយៈគម្រោងនេះ នឹងផ្តល់ការបណ្តុះបណ្តាលដល់បុគ្គលិក និងអ្នកស្ម័គ្រចិត្ត សុខាភិបាល និងផ្តល់ការអប់រំសុខភាពដល់មាតា នៅក្នុងស្រុកប្រតិបត្តគិរីវង់ និងស្រុកប្រតិបត្តិ កោះអណ្តែត ដើម្បីលើកកម្ពស់គុណភាព និងការទទួលបានសេវាទទួល សុខភាព ឱ្យកាន់តែ ល្អ ប្រសើរ និងកាត់បន្ថយអត្រាកុមារ ដែលខ្វះអាហារូបត្ថម្ភ និងជំងឺនានា ដែលឆ្លង តាមទឹកមិន ស្អាត ។គម្រោងនេះដែរ នឹងរួមបញ្ចូល នូវការសាងសង់ប្រព័ន្ធទឹកស្អាត និងបរិក្ខាអនាម័យ នៅមណ្ឌល សុខភាព ស្រុកប្រតិបត្តិចំនួន២ ដើម្បីកែលំអរបរិស្ថាន សុខាភិបាល។ គម្រោងទាំង២នេះ គឺជា គម្រោងលើកទី៧និងលើកទី៨ ដែលបានផ្តល់ជំនួយតាមរយៈគ្រោងការណ៍នៃជំនួយនៅកម្ពុជា សម្រាប់ឆ្នាំសារពើពន្ធ ឆ្នាំ២០១៧របស់ជប៉ុន។
សូមបញ្ជាក់ថា ចាប់តាំងពីឆ្នាំ២០០២មក រដ្ឋាភិបាលជប៉ុន បានផ្តល់ថវិកាជាង៣១លាន ដុល្លារអាមេរិក ដល់គម្រោងចំនួន១០៧ ដែលផ្តោតសំខាន់លើវិស័យអប់រំ នៅកម្រិតមូលដ្ឋាន វិស័យសុខាភិបាល វិស័យកសិកម្ម និងបោសសម្អាតមីន៕
