ឧត្រមានជ័យ ៖ ជនសង្ស័យម្នាក់ត្រូវបានកម្លាំងព្រហ្មទណ្ឌ នៃស្នងការនគរបាលខេត្តឧត្តរមានជ័យ កសាងសំណុំរឿងបញ្ជូនទៅតុលាការខេត្ត នារសៀលថ្ងៃទី ២ ខែមីនា ឆ្នាំ២០១៨ ពាក់ព័ន្ធនឹងករណីគប់គ្រាប់បែកច្នៃ បំផ្ទុះទៅក្នុងផ្ទះលក់អីវ៉ាន់ចាបហួយ នៅឃុំទំនប់ដាច់ ស្រុកត្រពាំងប្រាសាទ ខេត្តឧត្តរមានជ័យ។
ពាក់ព័ន្ធករណីខាងលើ សមត្ថកិច្ចជំនាញផ្នែកព្រហ្មទណ្ឌ នៃស្នងកាការនគរបាលខេត្ត បានចុះធ្វើការស៊ើបអង្កេត និងស្រាវជ្រាវ អស់រយពេលជាច្រើនថ្ងៃ ទើបកំណត់ មុខសញ្ញាឃាត់ខ្លួនជនសង្ស័យម្នាក់ ឈ្មោះ វ៉ាន់ តឿ ភេទប្រុស អាយុ៣០ ឆ្នាំ រស់នៅភូមិបន្ទាយចាស់ ឃុំព្រះប្រឡាយ ស្រុកត្រពាំងប្រាសាទ ខេត្តឧត្តរមានជ័យ។
សមត្ថកិច្ចបានអោយដឹងថា ក្នុងការចុះបង្ក្រាប កំលាំងជំនាញបានចុះឆែកឆេរផ្ទះជនសង្ស័យ រកឃើញគ្រាប់បែកដៃលាក់ទុកចំនួន១គ្រាប់ កាំភ្លើងកែឆ្នៃចំនួន ១ដើម និងរំសេវពណ៌ខ្មៅសម្រាប់ឆ្នៃគ្រាប់០១ ដប(M១៥០ ទម្ងន់ ១០ក្រាម) ។ ហើយកំកម្លាំងជំនាញផែនព្រហ្មទណ្ឌកំពុងតែកសាងសំណុំរឿងដើម្បី បញ្ជូនជនសង្ស័យ និងវត្ថុតាង ទៅសាលាដំបូងខេត្តនារសៀលដដែល។
គួរបញ្ជាក់ថា កាលពីវេលាម៉ោង៩ យប់ថ្ងៃទី២២ ខែកុម្ភៈ ឆ្នាំ២០១៨ ស្ថិតនៅចំណុចមុខមណ្ឌលសុខភាពទំនប់ដាច់ភូមិទួលពង្ររ ឃុំទំនប់ដាច់ ស្រុកត្រពាំងប្រាសាទ ខេត្តឧត្តរមានជ័យ មានករណីជនសង្ស័យ បានគប់គ្រាប់បែកប្រភេទច្នៃ ចូលក្នុងផ្ទះលក់អីវ៉ាន់ចាបហួយ ដែលផ្ទុះ បណ្តាលអោយស្ត្រីជាម្ចាស់ផ្ទះឈ្មោះ ជួប ឈុន អាយុ ៤៥ឆ្នាំមុខរបរអាជីវករ បានរងរបួសស្រាល៕
