ខេត្តព្រះសីហនុ ៖ អាជ្ញាធរក្រុងព្រះសីហនុ បានចេញលិខិតផ្អាកការដ្ឋានសំណង់សង់អត់ច្បាប់មួយកន្លែង មានទីតាំងនៅតាមឆ្នេរអូរឈើទាល មានទីតាំងនៅជាប់គេហដ្ឋានលំហែកាយ របស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។ នាព្រឹក ថ្ងៃទី២ ខែមីនា ឆ្នាំ២០១៨ ម្សិលនេះ។
លិខិតចុះថ្ងៃទី២ ខែមីនា ឆ្នាំ២០១៨ មានចុះហត្ថលេខា និងបោះត្រា លោក អ៊ី សុខឡេង អភិបាលក្រុងព្រះសីហនុ បានជម្រាបជូន លោក លី ឡាយ ម្ចាស់ការដ្ឋានសំណង់ផ្លូវអូរឈើទាល ស្ថិតក្នុងភូមិ៤ សង្កាត់៤ ក្រុង-ខេត្តព្រះសីហនុ ដែលកំពុងដាក់គ្រឿងចក្រគ្រោងសាងសង់សំណង់ ដោយពុំមានច្បាប់អនុញ្ញាតសាងសង់ ពីក្រសួងរៀបចំដែនដី នគររូបនីយកម្ម និងសំណង់ និងស្ថាប័នពាក់ព័ន្ធនោះទេ។ ដូច្នេះរដ្ឋបាលក្រុងព្រះសីហនុ សូមបិទការដ្ឋានគម្រោងសាងសង់សំណង់គ្រប់ប្រភេទ របស់លោក ចាប់ពីថ្ងៃចុះហត្ថលេខានេះតទៅ នឹងត្រូវអនុវត្តតាមលក្ខខណ្ឌដូចខាង ក្រោម៖
១- ត្រូវបញ្ឈប់គម្រោងការសាងសង់សំណង់គ្រប់ប្រភេទជាបន្ទាប់។
២- ត្រូវរុះរើរបងព័ទ្ធការដ្ឋានលើដីចំណីឆ្នេរ និងលើដីចិញ្ចើមផ្លូវសាធារណៈចេញ។
៣- ត្រូវដឹកគ្រឿងចក្រ និងសម្ភារៈផ្សេងៗ ដែលផ្គត់ផ្គង់ដល់ការសាងសង់ចេញពីការដ្ឋាន។
រដ្ឋបាលក្រុងសង្កត់ធ្ងន់ថា ក្នុងករណីលោក លី ឡាយ មិនព្រមអនុវត្តតាមខ្លឹមសារលិខិតខាងលើនេះទេ រដ្ឋបាលក្រុងព្រះសីហនុ នឹងចុះរឹបអូស និងដកហូតគ្រឿងចក្រ និងសម្ភារៈផ្សេងៗ ដែលផ្គត់ផ្គង់ដល់ការសាងសង់សំណង់ យកមករក្សាទុកនៅសាលាក្រុង ដោយមិនទទួលខុសត្រូវ នូវការខូចខាត និងបាត់បង់ព្រទ្យសម្បត្តិរបស់លោកឡើយ។
តាមការកត់សម្គាល់ ចាប់ពីព្រឹកថ្ងៃសៅរ៍ ទី៣ ខែមីនា ឆ្នាំ២០១៨ ឃើញមានសកម្មភាពរុះរើការដ្ឋានសំណង់ខាងលើយ៉ាងឆាប់រហ័យ ដោយមានវត្ត លោក អ៊ី សុខឡង អភិបាលក្រុងព្រះសីហនុ និងមន្ត្រីស្ថាប័នពាក់ព័ន្ធជាច្រើនរូបទៀត បានចូលរួមពិនិត្យមើលការរុះរើសំណង់ទាំងនោះ។
ការផ្អាកការដ្ឋានសំណង់ខាងលើនេះ គឺបានកើតឡើងក្រោយពេល សម្តេចតេជោ ហ៊ុន សែន កាលពីល្ងាចថ្ងៃទី២ ខែមីនា បានអញ្ជើញលំហែ នៅតាមឆ្នេរអូរឈើទាល ហើយទំនងជាឃើញសំណង់កំពុងសាងសង់នៅជាប់ឆ្នេរសមុទ្រ ឆ្នេរអូរឈើទាលនេះ កំពុងសាងសង់នៅលើដីចំណីឆ្នេរ សមុទ្រ និងប៉ះពាល់ដល់បរិស្ថានឆ្នេរធ្ងន់ធ្ងរ។
ទាក់ទិនបញ្ហានេះ ភ្ញៀវទេសចរ និងប្រជាពលរដ្ឋ ខេត្តព្រះសីហនុ បានសំណូមពរដល់សម្តេចប្រមុខដឹកនាំ ត្រូវយកទីធ្លាបរិវេណដីការដ្ឋានសំណង់ មានទីតាំងនៅ អតីតទីបញ្ជាការដ្ឋានកងរាជអាវុធហត្ថខេត្តព្រះសីហនុ ខាងលើនេះ ដើម្បីយកទៅអភិវឌ្ឍជាសួនច្បារសាធារណៈ ទុកជូនភ្ញៀវទេសចរជាតិអន្តរជាតិចូលទៅកម្សាន្ត វិញប្រសើរជាង៕
