សៀមរាប ៖ សម្រាប់ការប្រារព្ធព្រឹត្ដិការណ៍អង្គរសង្ក្រានឆ្នាំ២០១៨នេះ ដែលជាព្រឹត្ដិការណ៍រៀបចំឡើងដើម្បី អបអរសាទរពិធីបុណ្យចូលថ្មីប្រពៃណីជាតិខ្មែរនោះ ត្រូវបានជ្រើសរើសយកប្រធាន”សាទរមរតកដូនតា”។ ការជ្រើសរើសយកប្រធានបទនេះ គឺក្នុងគោលបំណងលើកយកនូវកេរ្តិ៍តំណែងអរិយធម៌ វប្បធម៌ ទំនៀមទម្លាប់ និងស្នាដៃរបស់បុព្វបុរសខ្មែរមករំលេចឡើង ជាផ្ទាំងទស្សនីយភាពវប្បធម៌នានាជាច្រើនមកបង្ហាញជូនភ្ញៀវទេសចរណ៍ជាតិ និងអន្ដរជាតិ។
សហភាពសហព័ន្ធយុវជនកម្ពុជា(សសយក) នៅថ្ងៃទី៦ ខែមីនានេះ បានប្រកាសជាផ្លូវការនូវដំណើរការរៀបចំព្រឹត្ដិការណ៍អង្គរសង្ក្រានឆ្នាំ២០១៨ ក្រោមប្រធានបទ”សាទរមរតកដូនតា”ដើម្បីអបអរសាទរពិធីបុណ្យចូលថ្មីប្រពៃណីជាតិខ្មែរ នៅឧទ្យានជាតិអង្គរ ខេត្ដសៀមរាប។ ការជ្រើសរើសយកប្រធានបទនេះ គឺមានបំណងលើកយកនូវកេរ្តិ៍តំណែងអរិយធម៌ វប្បធម៌ ទំនៀមទម្លាប់ និងស្នាដៃរបស់បុព្វបុរសខ្មែរមករំលេចឡើង ជាផ្ទាំងទស្សនីយភាពវប្បធម៌នានាជាច្រើន។
ឯកឧត្ដមហ៊ុន ម៉ានី ប្រធានគណៈកម្មការរៀបចំព្រឹត្ដិការណ៍អង្គរសង្ក្រានឆ្នាំ២០១៨ និងជាប្រធានក្រុមការងារប្រតិបត្ដិនៃព្រឹត្ដិការណ៍អង្គរសង្ក្រាឆ្នាំ២០១៨ បានឲ្យដឹង ក្នុងសន្និសីទសារព័ត៌មាន នាព្រឹកមិញនេះ ថា ព្រឹត្ដិការណ៍អង្គរសង្ក្រានជាព្រឹត្ដិការណ៍ ដែលរៀបចំឡើងដើម្បីចូលរួមអបអរសាទរ ពិធីបុណ្យចូលឆ្នាំថ្មីប្រពៃណីជាតិខ្មែរ និងផ្ដល់នូវការសប្បាយរីករាយជួបជុំគ្នា តាមរយៈការបង្ហាញអំពីល្បែងប្រជាប្រិយ របាំប្រពៃណី ទំនៀមទម្លាប់នៃការរស់នៅរបស់ប្រជាជនខ្មែរ សិល្បៈទស្សនីយភាពផ្សេងៗ ដែលសម្ដែងដោយយុវជន យុវនារី សិល្បករខ្មែរ រួមជាមួយនឹងការលើកយកនូវកេរ្តិ៍តំណែងអរិយធម៌ និងស្នាដៃនានារបស់បុព្វបុរសខ្មែរ ដែលបានបន្សល់ទុកតាំងពីយូរលង់មកនោះ មករំលេចឡើងជាផ្ទាំងទស្សនីយភាពថ្មីៗ និងប្លែកអស្ចារ្យ ដើម្បីដាក់បង្ហាញជូនភ្ញៀវជាតិ និងអន្ដរជាតិ ដែលចូលរួមទស្សនាកម្សាន្តលើទឹកដីនៃខេត្ដសៀមរាប។
បើតាមឯកឧត្ដមហ៊ុន ម៉ានី ក៏បានបញ្ជាក់ដែរ ថា ព្រឹត្ដិការណ៍អង្គរសង្ក្រានក៏ធ្វើឲ្យមានការចំណេញដល់សេដ្ឋកិច្ចជាតិផងដែរ។ ព្រោះបើតាមរបាយការណ៍របស់ក្រសួងទេសចរណ៍ បានបង្ហាញ ថា ព្រឹត្ដិការណ៍អង្គរសង្ក្រាន បានទាក់ទាញភ្ញៀវទេសចរណ៍ជាច្រើនម៉ឺននាក់ និងធ្វើឲ្យចំណូលសេដ្ឋកិច្ចជាតិកើនឡើងជារៀងរាល់ឆ្នាំថែមទៀត។
ចំណែកឯកឧត្ដមសុខ សប្បាយណា ប្រធានលេខធិការដ្ឋានក្រុមការងារប្រតិបត្ដិនៃព្រឹត្ដិការណ៍អង្គរសង្ក្រាន បានឲ្យដឹងដែរ ថា នៅក្នុងព្រឹត្ដិការណ៍អង្គរសង្ក្រានឆ្នាំ២០១៨ ដែលនឹងប្រព្រឹត្ដទៅចាប់ពីថ្ងៃទី១៣ ដល់ថ្ងៃទី១៦ ខែមេសាខាងមុខនេះ នឹងមានកម្មវិធីជាច្រើន ដែលសុទ្ធសឹងតែឆ្លុះបញ្ចាំងពីអរិយធម៌ វប្បធម៌ ទំនៀមទម្លាប់ និងប្រពៃណីខ្មែរ ក៏ដូចជាកម្មវិធីមហោស្រពវប្បធម៌បុរាណ ក្រោមទិដ្ឋភាពកម្មវិធីល្ខោនព្រះរាជទ្រព្យរឿង”មហាវេស្សន្តរជាតក”ជាផ្ទាំងទស្សនីយភាពយ៉ាងពិសេស ដែលដកស្រង់ចេញពីគម្ពីទសជាតក ដែលជាជាតិចុងក្រោយរបស់ព្រះសម្មាសម្ពុទ្ធមកសម្ដែងផងដែរ។
ក្រៅពីកម្មវិធីខាងលើនេះ ព្រឹត្ដិការណ៍អង្គរសង្ក្រានឆ្នាំ២០១៨ នឹងនាំមកនូវកម្មវិធីជាច្រើនផ្សេងទៀត ដូចជា៖កម្មវិធីភូមិខ្ញុំ កម្មវិធីភូមិបេកភណ្ឌវប្បធម៌ កម្មវិធីព្រៃប្រសិទ្ធី កម្មវិធីសហស្សវិចិត្រវាយនា កម្មវិធីភូមិអាហារនៃក្ដីស្រលាញ់ កម្មវិធីទាញព្រ័ត្យមិត្ដភាពអង្គរសង្ក្រាន កម្មវិធីគុណល្បុក្កតោជាដើម។ បើតាមឯកឧត្ដមសុខ សប្បាយណា សម្ដេចតេជោហ៊ុន សែន នាយករដ្ឋមន្ដ្រីនៃព្រះរាណាចក្រកម្ពុជា និងសម្ដេចកិត្ដិព្រឹទ្ធបណ្ឌិតប៊ុន រ៉ានីហ៊ុន សែន ក៏នឹងមានវត្ដមានដ៏ខ្ពង់ខ្ពង់ នៅក្នុងកម្មវិធីព្រឹត្ដិការណ៍អង្គរសង្ក្រាននាឆ្នាំ២០១៨នេះផងដែរ។
សូមជម្រាប ថា គិតមកដល់ឆ្នាំ២០១៨នេះ គឺជាលើកទី៦ហើយ ដែលសហភាពសហព័ន្ធយុវជនកម្ពុជា សហការជាមួយស្ថាប័ន និងអាជ្ញាធរពាក់ព័ន្ធ បានរួមគ្នារៀបចំព្រឹត្ដិការណ៍អង្គរសង្ក្រានលើទឹកដីនៃខេត្ដសៀមរាប។ ភាពជោគជ័យទាំង៥លើកកន្លងមកនេះ បានញ៉ាំឲ្យព្រឹត្ដិការណ៍អង្ក្រាន បន្តសម្រេចបាននូវគោលដៅចម្បងៗជាច្រើន ដែលក្នុងនោះព្រឹត្ដិការណ៍នេះ ក៏បានផ្ដល់ឱកាសឲ្យប្រទេសកម្ពុជា បានផ្សព្វផ្សាយ និងលើកតម្កើងអរិយធម៌ វប្បធម៌ ព្រមទាំងស្នាដៃដ៏វិសេសវិសាលរបស់ខ្លួន នៅលើឆាកអន្ដរជាតិថែមទៀត៕
