ភ្នំពេញ ៖ ផ្ទះវីឡាដ៏ធំមួយ នៅក្បែរផ្សារសាមហាន់ ស្ថិតក្នុងសង្កាត់ទួលសង្កែទី១ ខណ្ឌឬស្សីកែវ ត្រូវបានអគ្គិភ័យឆាបឆេះអស់ទ្រព្យសម្បត្តិមួយចំនួន ដោយបង្កការភ្ញាក់ផ្អើលដល់ប្រជាពលរដ្ឋ និងសមត្ថកិច្ចជាខ្លាំងកាលពីវេលាម៉ោង៥ទាបភ្លឺ ថ្ងៃទី២២ ខែមីនា ឆ្នាំ២០១៨នេះ ។
តាមប្រភពព័ត៌មានពីប្រជាពលរដ្ឋដែលរស់នៅក្បែរកន្លែងកើតហេតុ ខាងលើបានឲ្យដឹងថា មុនពេលកើតហេតុ គេឃើញមានផ្សែងហុយចេញពីដំបូលផ្ទះវីឡាខាងលើ រួចក៏ឆេះចេញជាអណ្ដាតភ្លើងយ៉ាងសន្ធោសន្ធៅ ។ ភ្លាមៗនោះដែរ ក៏មានប្រជាពលរដ្ឋរាយការណ៍ទៅសមត្ថកិច្ចមូលដ្ឋានឲ្យចុះមកជួយអន្តរាគមន៍ រួមទាំងនាំគ្នាជញ្ចូនអីវ៉ាន់ជាច្រើនសុទ្ធតែជារបស់របរលក់ដូរចាបហ៊ួយ ។ ហើយមួយសន្ទុះក្រោយមក ក៏មានរថយន្តពន្លត់អគ្គិភ័យជាច្រើនគ្រឿងចេញមកអន្តរាគមន៍បាញ់ពន្លត់ ដោយប្រើពេលវេលាកន្លះម៉ោង និងប្រើប្រាស់ទឹកបាញ់ពន្លត់អស់ចំនួន៤ឡាន ទើបអគ្គិភ័យខាងលើក៏បានរលត់ទៅវិញជាស្ថាពរតែម្ដង។
ក្នុងករណីអគ្គិភ័យខាងលើនេះ សមត្ថកិច្ចដែលចុះទៅអន្តរាគមន៍បានសន្និដ្ឋានថា អគ្គិភ័យនេះកើតឡើង បណ្ដាលមកពី ផ្ទុះសេខ្សែភ្លើង តែនៅមិនទាន់ដឹងច្បាស់ថា ទ្រព្យសម្បត្តិនៅក្នុងផ្ទះវីឡាខាងលើនោះ បើគិតជាទឹកប្រាក់អស់ប៉ុន្មាននោះទេ ខណៈពេលដែរក្រោយពីកើតហេតុរួច សមត្ថកិច្ចបានបន្តនៅធ្វើកំណត់ហេតុ ដើម្បីរាយការណ៍ជូនទៅថ្នាក់លើ៕
