ភ្នំពេញ ៖ ព្រឹកថ្ងៃទី៤ ខែមេសា ឆ្នាំ២០១៨នេះ នាទីស្តីការក្រសួងយុត្តិធម៌ ឯកឧត្តម អង្គវង្ស វឌ្ឍនា រដ្ឋមន្ត្រីក្រសួងយុត្តិធម៌ បានដឹកនាំកិច្ចប្រជុំគណៈកម្មការថ្នាក់ជាតិ ដើម្បីពិនិត្យ និងវាយ តម្លៃបញ្ជីឈ្មោះទណ្ឌិតស្នើសុំបន្ធូរបន្ថយទោស និងលើកលែងទោស ក្នុងឱកាសបុណ្យចូល
ឆ្នាំថ្មីប្រពៃណីជាតិ ដែលទទួលបានពីគណៈកម្មការថ្នាក់រាជធានីខេត្ត(ពន្ធនាគារចំនួន២០) និងគណៈកម្មការក្រសួងមហាផ្ទៃ(មណ្ឌលអប់រំកែប្រែចំនួន៤) លើបញ្ជីទណ្ឌិតស្នើសុំសរុប ចំនួន ៣២១នាក់ ក្នុងនោះមានស្ត្រីចំនួន ២៨នាក់។
ថ្លែងប្រាប់អ្នកសារព័ត៍មានជុំវិញបញ្ហានេះ អគ្គនាយករង នៃអគ្គនាយកដ្ឋានកិច្ចការ អយ្យការក្រសួងយុត្តិធម៌ ឯកឧត្តម ស៊ុច សុផាន់ណារ៉ា បានអោយដឹងថា ចំពោះការស្នើសុំ
លើកលែងទោស និងបន្ធូរបន្ថយទោសនេះ បានឈរនៅលើគោលការណ៍ច្បាប់ និងស្ថិត
ក្រោមការត្រួតពិនិត្យយ៉ាងល្អិតល្អន់ចំពោះឥរិយាបថរបស់ទណ្ឌិតដែលបានស្នើសុំ។
សូមជម្រាបជូនថា ជាទូទៅក្នុង១ឆ្នាំ កម្ពុជាមានការលើកលែងទោស និងបន្ធូរបន្ថយ ទោសចំពោះទណ្ឌិតចំនួន ៣ដង គឺក្នុងពិធីបុណ្យចូលឆ្នាំថ្មីប្រពៃណីជាតិ ពិធីបុណ្យវិសាខ បូរជា និងព្រះរាជពិធីបុណ្យអុំទូក៕
