ភ្នំពេញ ៖ អគ្គលេខាធិការដ្ឋរដ្ឋសភា ថ្ងៃទី១១ ខែមេសា ឆ្នាំ២០១៨នេះបានរៀបចំធ្វើសន្និបាតបូក សរុបលទ្ធផលការងាររបស់ខ្លួនពីឆ្នាំ២០១៣ ដល់ឆ្នាំ២០១៧ សម្រាប់នីតិកាលទី៥ នៃរដ្ឋសភា និងកំណត់ទិសដៅបន្តសម្រាប់នីតិកាលទី៦ ដោយក្នុងមហាសន្និបាតនេះអគ្គលេខាធិការដ្ឋាន រដ្ឋសភាបានរំលេចពីការអភិវឌ្ឍនៅក្នុងស្ថាប័នរបស់ខ្លួន ដើម្បីឆ្លើយតបទៅនឹងវិសាលភាពការ ងាររបស់រដ្ឋសភា ដែលកាន់តែមានភាពសំខាន់ឡើងៗ និងការធ្វើសមាហរណកម្មរបស់ខ្លួន នៅក្នុងតំបន់ និងពិភពលោក។
ឯកឧត្តម ឡេង ប៉េងឡុង អគ្គលេខាធិការរដ្ឋសភាមានប្រសាសន៍ថា បំណងចម្បង របស់យើងគឺការបង្កើនប្រសិទ្ធភាពនៃការគ្រប់គ្រង និងការបង្កើនគុណភាពនៃការងារ។ ក្នុង ន័យនេះយោងតាមលទ្ធភាពជាក់ស្តែង យើងបានបង្រួមបណ្តានាយកដ្ឋានដែលឧបនិស្ស័យ មានការទាក់ទងគ្នាជិតស្និទ្ធអោយស្ថិតក្នុងអគ្គនាយកដ្ឋានជាមួយគ្នា ចំណែកវិស័យដែលសារ សំខាន់ខ្លាំងក៏ត្រូវបានបង្រួបបង្រួមគ្នាដែរ។
ឯកឧត្តមបានបញ្ជាក់ថា អគ្គលេខាធិការដ្ឋានរដ្ឋ សភាក៏មានកាតព្វកិច្ចស្នូលក្នុងយុទ្ធសាស្ត្រចតុកោណដំណាក់កាលទី៣ ជាអាទិ៍ ការអនុវត្ត កំណែទម្រង់ហិរញ្ញវត្ថុសាធារណៈ ដែលតម្រូវអោយមានការរៀបចំថវិកាតាមអង្គភាពរដ្ឋបាល ហើយក៏តម្រូវអោយធ្វើការរៀបចំធនធានមនុស្សអោយត្រូវទៅនឹងជំនាញ និងបទពិសោធន៍ ទៀតផង។
សម្រាប់មហាសន្និបាតនេះអនុប្រធានទី២ រដ្ឋសភា ឯកឧត្តម បណ្ឌិត ងួន ញុិល គូស បញ្ជាក់ថា ទោះបីជារដ្ឋសភាសម្រេចបាននូវលទ្ធផលជាច្រើន និងគួរជាមោទនៈក៏ដោយ ក៏ យើងនៅតែជួបបញ្ហាប្រឈមនានាមួយចំនួន ក្នុងនោះមានបញ្ហាធនធានមនុស្ស អ្នកជំនាញ ឯកទេស ហេដ្ឋារចនាសម្ព័ន្ធ និងបច្ចេកវិទ្យាព័ត៍មានជាដើម។ ដើម្បីឆ្លើយតបទៅនឹងកំណើន នៃតម្រូវការ និងទំហំការងាររបស់រដ្ឋសភា ក៏ដូចជាដើម្បីចូលរួមបន្តអនុវត្តកម្មវិធីនយោបាយ របស់រាជរដ្ឋាភិបាលអនុប្រធានទី២ រដ្ឋសភា ឯកឧត្តមបណ្ឌិត ងួន ញ៉ិល បានផ្តល់អនុសាសន៍ មួយចំនួនដល់មន្ត្រីអគ្គលេខាធិការដ្ឋានរដ្ឋសភា សំដៅធ្វើយ៉ាងណាប្រែក្លាយស្ថាប័នមួយនេះ អោយកាន់តែទំនើប និងមានសមត្ថភាពជាងមុន ក្នុងការជួយជ្រោមជ្រែងដល់តួនាទីស្នូល របស់រដ្ឋសភា សំដៅលើកកម្ពស់លទ្ធិប្រជាធិបតេយ្យ នីតិរដ្ឋ និងអភិបាលកិច្ចល្អនៅកម្ពុជា ក៏ ដូចជាក្នុងការជួយពង្រឹងសមត្ថភាពការទូតសភាកម្ពុជានៅលើឆាកអន្តរជាតិ៕
