ភ្នំពេញ ៖ លោក ឡាយ វណ្ណៈ អតីតអភិបាលខេត្តតាកែវ ត្រូវបានសម្ដេចវិបុលសេនាភក្ដីសាយ ឈុំ អនុប្រធានគណបក្សប្រជាជនកម្ពុជា ចេញសេចក្តីសម្រេច ដកចេញពីសមាជិកគណបក្សប្រជាជនកម្ពុជា បន្ទាប់ពីលោកត្រូវបានឃុំខ្លួនបណ្ដោះអាសន្ន ពាក់ព័ន្ធនឹងអំពើឃាតកម្ម។
យោងតាមសេចក្ដីសម្រេច របស់សម្ដេចវិបុលសេនាភក្ដីសាយ ឈុំ អនុប្រធានគណបក្សប្រជាជនកម្ពុជា បានសរសេរ ថា”ប្រការ១.បញ្ចេញលោកឡាយ វណ្ណៈ ពីសមាជិកគណបក្សប្រជាជនកម្ពុជា”។
ប្រការ២.ខុទ្ទកាល័យគណៈចាត់តាំងនៃគណៈកម្មាធិការកណ្ដាល គណៈកម្មាធិការគណបក្សខេត្តតាកែវ និងលោកឡាយ វណ្ណៈ ត្រូវប្រតិបត្តិតាមសេចក្ដីសម្រេចនេះ។
គួររំលឹក ថា លោកឡាយ វណ្ណៈ និងបងប្រុសរបស់លោក រួមទាំងមនុស្ស២នាក់ទៀត ត្រូវបានតុលាការសម្រេចឃុំខ្លួនដាក់ពន្ធនាគារជាបណ្តោះអាសន្ន កាលពីថ្ងៃទី៣ ខែមេសា ឆ្នាំ២០១៨ ក្រោមការចោទប្រកាន់ឃាតកម្ម និងលាក់បាំងតម្រុយ ពាក់ព័ន្ធករណីធ្វើឃាតកម្មលើស្ត្រីឈ្មោះចេវ សុវឌ្ឍនា ដែលជានារីកំណាន់របស់លោកឡាយ វណ្ណៈ។
ជនត្រូវចោទទាំង៤នាក់ដែលត្រូវបានតុលាការសម្រេចឃុំខ្លួនរួមមាន៖ទី១.លោក ឡាយ វណ្ណៈ អតីតអភិបាលខេត្តតាកែវ, ទី២.លោកឡាយ ណារិទ្ធ ស្នងការរងនគរបាលខេត្តតាកែវ ត្រូវជាបងប្រុសលោក ឡាយ វណ្ណៈទី៣.ឈ្មោះម៉េន សាម៉ៃ អ្នកបើកឡានឲ្យលោកឡាយ វណ្ណៈ និងទី៤.ឈ្មោះ ជឹម វុធ ហៅ ថូត ជាអ្នកបំរើនៅផ្ទះនាង ចេវ សុវឌ្ឍនា។
លោកឡាយ វណ្ណៈ ត្រូវបានដកដំណែងមួយចំនួនទៀតផងដែរ ដែលរួមមាន៖តំណែងអភិបាលខេត្ត និងប្រធានគណបក្សខេត្តតាកែវផងដែរ៕
