ភ្នំពេញ ៖បុរសម្នាក់បានស្លាប់ភ្លាមៗនៅកន្លែងកើតហេតុបន្ទាប់ពីត្រូវ ខ្មាន់កាំ ភ្លើងដេញតាមបាញ់២ គ្រាប់កាលពីវេលាម៉ោង១និង១៥នាទីរំលងអធ្រាត្រឈានចូលថ្ងៃទី៧ខែមេសា ឆ្នាំ២០១៥នេះស្ថិតនៅផ្លូវលេខ៥១បេតុង ក្រុម៦ ភូមិសន្សំកុសល៤ សង្កាត់បឹងទំពុន ខណ្ឌមានជ័យ ។
ប្រភពបានឱ្យដឹងថា ជនរងគ្រោះឈ្មោះពួក គឹមហុង អាយុ២៦ឆ្នាំ ដើរលក់ថ្នាំពេទ្យ ស្នាក់នៅផ្ទះលេខ៣៣ ក្បែរកន្លែងកើតហេតុ មានស្រុកកំណើតនៅភូមិរមិញខាងជើង ឃុំរមិញ ស្រុកកោះអណ្តើក ខេត្តតាកែវ ។
សមត្ថកិច្ចបានឱ្យដឹងថា មុនពេលកើតហេតុ ជនរងគ្រោះជិះម៉ូតូធុនធំម៉ាក MSX ពណ៌ខ្មៅ ពាក់ស្លាកលេខភ្នំពេញ 1CC 0005 បើកបរតាមផ្លូវបេតុង ពីកើតទៅលិច ខណៈមកជិតដល់ផ្ទះហើយ ស្រាប់តែមានជនសង្ស័យ៥នាក់ ជិះម៉ូតូ២គ្រឿងមិនចាំម៉ាកបានជិះដេញតាមជនរងគ្រោះ ហើយជនរងគ្រោះបានស្រែកថា ចោរៗស្រាប់តែមានឮស្នូរបាញ់២គ្រាប់ ធ្វើឱ្យរងរបួសមួយគ្រាប់ចំបបូរមាត់លើខាងឆ្វេងមួយគ្រាប់ ធ្លាយហូរឈាមដេកស្លាប់នៅតាមចិញ្ចើមផ្លូវនៅជាប់ម៉ូតូ ដែលជនសង្ស័យមិនបានយកម៉ូតូចេញទេ បាននាំគ្នាគេចខ្លួនអស់ ។
សមត្ថកិច្ចមិនទាន់បានសន្និដ្ឋានថា ជារឿងប្លន់ ឬក៏គំនុំនៅឡើយទេ ព្រោះម៉ូតូរបស់ជនរងគ្រោះមិនបានបាត់បង់ទេ គ្រាដែលប្រជាពលរដ្ឋសន្និដ្ឋានដំបូងថា អាចជាករណីគំនុំ ឬ ទំនាស់ច្រើនដង ៕
