ខេត្តកំពង់ឆ្នាំង ៖ មន្ត្រីអង្គភាពកំចាត់មីន ស៊ីម៉ាក កាលពីព្រឹកថ្ងៃទី៨ ខែឧសភា ឆ្នាំ២០១៨ បានចុះធ្វើការ គាស់ យកគ្រាប់បែកមួយប្រភេទ ដែលជាគ្រាប់ទម្លាក់ពីលើយន្តហោះ នៅចំណុចភ្នំបួរ ស្ថិតក្នុងភូមិព្រៃគ្រីជើង ឃុំព្រៃគ្រី ស្រុកជលគីរី ហើយបានដឹកយកទៅរក្សាទុក នៅមជ្ឈ មណ្ឌលហ្វឹកហ្វឺនកំចាត់មីន ស៊ីម៉ាក់ខេត្តកំពង់ឆ្នាំង ។
តាមប្រភពពីប្រជាពលរដ្ឋ ដែលរស់នៅជិតកន្លែងកើតហេតុ បានអោយដឹងថា គ្រាប់បែកទម្លាក់ពីលើយន្តហើយនោះ ត្រូវបានប្រជាពលរដ្ឋប្រទះឃើញកាលពីថ្ងៃទី៥ ខែឧសភា ឆ្នាំ២០១៨ ហើយបានរាយការណ៍ ជូនអាជ្ញាធរមូលដ្ឋាន និងមន្ត្រីស៊ីម៉ាក់ ក្នុងនោះដែរ ក៍មានបណ្តាញសង្គមហ្វេសបុក ក៍បានបង្ហោះរូបភាព ពីការប្រទះឃើញនេះដែរ បន្ទាប់មកសមត្ថកិច្ច មូលដ្ឋានបានព័ទ្ឋខ្យែ ការពារ មិនអោយប្រជាពលរដ្ឋ ចូលទៅជិត ដើម្បីការពារសុវត្ថិភាព ។ រហូតដល់ព្រឹក ថ្ងៃទី៨ ខែឧសភា ទើបគេឃើញមន្ត្រី ស៊ីម៉ាក់ ចុះទៅត្រួតពិនិត្យ និងប្រើបច្ចេកទេស ដោះនិងគាស់យកគ្រាប់បែក ទម្លាក់ពីលើយន្តហោះនោះ ដឹកយកទៅអង្គភាពដើម្បីរក្សាទុក តាមជំនាញ ។
យោងតាមប្រភពពីមន្ត្រីស៊ីម៉ាក់ ដែលបានចុះទៅយកគ្រាប់នោះផ្ទាល់បានអោយដឹងថាៈគ្រាប់បែក យ៉ាងធំនេះ មានឈ្មោះ MK.83 ជាប្រភេទគ្រាប់ទម្លាក់ពីលើយន្តហោះ ជំនាន់សង្គ្រាម ។ជាគ្រាប់ទម្លាក់ដែល ផលិតនៅប្រទេសអាមេរិក ។ គ្រាប់នេះមានទម្ងន់ ១ពាន់ផោនឬស្មើនឹងប្រមាណជិត៥០០គីឡូក្រាម ។ លោកបានបញ្ជាក់ថា គ្រាប់ប្រភេទនេះ អាចនឹងផ្ទុះបាន ប្រសិនបើយើងទៅប៉ះឬវាយចំគីបបំបែករបស់វា ប៉ុន្តែមន្ត្រីអង្គភាពស៊ីម៉ាកបាន ប្រើវិធីតាមជំនាញ ដោះយកគ្រាប់នោះបានដោយសុវត្ថិភាព ដើម្បីយកមករក្សាទុកនៅអង្គភាពរួចហើយ ៕
