សៀមរាប ៖ កាលពីរសៀលម៉ោង ១និង១៥នាទី ថ្ងៃទី១៦ ខែឧសភា ឆ្នាំ២០១៨ នេះ មានភ្លៀងធ្លាក់ លាយឡំដោយខ្យល់កន្ត្រាក់ និងរន្ទះបាញ់ បានកើតឡើងនៅក្នុងភូមិសាស្ត្រ ឃុំមុខប៉ែន និងឃុំព្រៃជ្រូក ស្ថិតក្នុងស្រុកពួក បណ្ដាលឲ្យស្លាប់មនុស្ស១ នាក់ , រងរបួសម្នាក់ ខូចខាតលំនៅដ្ឋាន២ខ្នង , ងាប់សត្វគោចំនួន០៣ក្បាលនិងសត្វឆ្កែចំនួន១ក្បាល ។
លោកវរសេនីយ៍ឯក ទេព ពុំសែន អធិការនគរបាលស្រុកពួក បានឲ្យដឹងថា ករណីរន្ទះបាញ់ មនុស្សកើតឡើងនៅនៅចំណុចត្រពាំងតាអុកទឹក ភូមិគោករាំង ឃុំមុខប៉ែន បណ្ដាលឲ្យឈ្មោះ វឿន ដុស ភេទប្រុស អាយុ ៤៩ឆ្នាំ មុខរបរធ្វើស្រែ ស្លាប់នៅនឹងកន្លែងកើតហេតុ និង ឈ្មោះ ជន នន់ ភេទប្រុស អាយុ៤៨ឆ្នាំ មុខរបរធ្វើស្រែ បានរងរបួសធ្ងន់កំពុងសង្គ្រោះនៅមន្ទីរពេទ្យ ខណៈជនរងគ្រោះទាំងពីរនាក់កំពុងដេីរឃ្វាលគេា ហើយជនរងគ្រោះទាំងពីរនាក់រស់នៅភូមិស្វាហួល ឃុំមុខប៉ែន ។
លោកអធិការបន្តថា ដោយឡែក នៅរសៀលថ្ងៃដដែលនៅក្នុងឃុំព្រៃជ្រូក មានករណីរន្ទះបាញ់ងាប់គោ ០៣ ក្បាល បានកើតឡើងនៅចំណុចវាលស្រែក្នុងភូមិផ្លាំង ហើយនៅភូមិប្រាសាទ និងនៅភូមិស្វាយចន្ទោរ ក៏កើតមាននូវករណីខ្យល់កន្ត្រាក់បណ្តាលឲ្យខូចខាតផ្ទះប្រជាពលរដ្ឋពីរខ្នង ក្នុងនោះមួយខ្នងទំហំ៦×៧ម៉ែត្រ រលំធ្លាក់ពីជើងតាង និងមួយខ្នងរបើកដំបូល៕
