ខេត្តក្រចេះ៖ ពលរដ្ឋ២នាក់ តំណាងពលរដ្ឋ៣១គ្រួសារ ដែលត្រូវកម្លាំងចម្រុះខេត្តក្រចេះចុះដុតផ្ទះ និងឈូសឆាយដីដំណាំកាលពីម្សិលមិញ នឹងត្រូវបញ្ជូនទៅតុលាការដើម្បីសាកសួរនៅល្ងាចថ្ងៃទី៩ មេសា។
ទាក់ទងនឹងការបញ្ជូនអ្នកទាំងពីរនាក់ ទៅតុលាការនៅពេលនេះ មិនមានមន្ត្រីប៉ូលិសអធិការដ្ឋានកម្រិតស្រាលស្រុកធ្លូងណា ផ្ដល់ពីមូលហេតុដែលអាជ្ញាធរចាប់ខ្លួនអ្នកទាំងពីរឃុំខ្លួន និងបញ្ជូនទៅសាកសួរនៅតុលាការឡើយ។
ទោះជាយ៉ាងណាក្ដីក្រុមប្រជាពលរដ្ឋអះអាងថា ពួកគាត់នឹងរៀបចំឯកសារនានា ដោយធ្វើដំណើរទៅរាជធានីភ្នំពេញ ដើម្បីសុំអន្តរាគមន៍ពីរដ្ឋសភា។ ក្រុមពលរដ្ឋបន្តថា ពួកគាត់អ្វីទីពឹងទៀតទេ ព្រោះតំណាងគាត់២នាក់ គឺលោក ផន់ សាវណ្ណ និងលោកស្រី យស សាអែម ត្រូវសមត្ថកិច្ចចាប់ខ្លួនអស់ហើយ។
ជុំវិញជម្លោះរបស់អាជ្ញាធរខេត្ត និងពលរដ្ឋ៣១គ្រួសារ នៅភូមិ ប្រឡាយទ្រៀល ឃុំដំរីផុង ស្រុកឆ្លូង បានផ្ទុះកម្លៅកាន់តែខ្លាំងឡើង បន្ទាប់ពីសមត្ថកិច្ចចុះឈូសឆាយផ្ដួលរំលំ ដុតបំផ្លាញផ្ទះសម្បែង ដី ដំណាំរបស់ពលរដ្ឋទាំងនោះ។
សមត្ថកិច្ចបានចោទថា ពលរដ្ឋទាំង៣១គ្រួសារ បានមករស់នៅខុសច្បាប់លើដី ដែលអាជ្ញាធរប្រគល់ឲ្យក្រុមពលរដ្ឋ៧២គ្រួសារផ្សេងទៀត ប៉ុន្តែពលរដ្ឋបានអះអាងថា ខ្លួនបានរស់នៅលើដីមានជម្លោះនេះ មុនអាជ្ញាធរបានប្រគល់ដី ដល់ពលរដ្ឋ៧២គ្រួសារនោះទៀត៕rfa
សកម្មភាពដុត និងផ្ដួលរំលំផ្ទះប្រជាពលរដ្ឋនៅចំណុចអូរសំពុង ភូមិប្រឡាយទ្រៀល ឃុំដំរីផុង ស្រុកឆ្លូង ខេត្តក្រចេះ កាលពីថ្ងៃទី៨ ខែមេសា ឆ្នាំ២០១៥។ RFA
