ភ្នំពេញ ៖ ក្នុងរយៈពេល៥ខែ ដើមឆ្នាំ២០១៨ នេះ គ្រោះមហន្តរាយធម្មជាតិនៅទូទាំង ប្រទេសកម្ពុជា បានកើតឡើងចំនួន ១០៧លើក បណ្តាលឲ្យមនុស្សស្លាប់ និងរងរបួសចំនួន១៤៣នាក់ និងផ្ទះសម្បែងរងការខូចខាតចំនួន ២.២៧៩ខ្នង ក្នុងនោះ អ្នកស្លាប់ដោយសាររន្ទះបាញ់ ចំនួន ៤៣នាក់ រងរបួសចំនួន ៣៤នាក់ និងបណ្តាលឲ្យសត្វពាហនៈងាប់ចំនួន ៥៤ក្បាល។ នេះបើតាមការបញ្ជាក់របស់លោក កែវ វី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ។
យោងតាមរបាយការណ៍គណៈកម្មាធិការជាតិគ្រប់គ្រងគ្រោះមហន្តរាយ បានបញ្ជាក់ថា ក្នុង អំឡុងខែឧសភា កន្លងទៅនេះ ភ្លៀងលាយខ្យល់កន្ត្រាក់ បានកើតឡើងចំនួន ៥៤លើក បង្កឲ្យខូច ខាតផ្ទះ ដោយដួលរំលំធ្ងន់ធ្ងរចំនួន ២៨៣ខ្នង និងខូចខាតមធ្យម ៩៩៨ខ្នង រួមទាំងសាលារៀន ចំនួន ៦អាគារ។ ចំណែកឯប្រជាពលរដ្ឋស្លាប់ដោយសាររន្ទះបាញ់ ៤៣នាក់ និងរបួស ៣៤នាក់ ហើយនិងគោក្របីងាប់ចំនួន ៥៤ក្បាល ។ ចំនួននេះ មានការកើនឡើងប្រមាណ៣០ភាគរយ បើធៀបរយៈ ពេលដូចគ្នាទៅនឹងឆ្នាំមុន។
លោក កែវ វី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានបន្ថែមថា ការ ផ្លាស់ប្តូរពីរដូវប្រាំង ទៅរដូវវស្សា ជារៀងរាល់ឆ្នាំ គឺតែងតែកើតមាននូវខ្យល់ព្យុះ ផ្គររន្ទះ ជាពិសេសចន្លោះខែមេសា ទៅខែមិថុនា ។
លោក កែវ វី បានបញ្ជាក់ទាក់ទិនទៅនឹងបញ្ហាទឹកជំនន់ ថា ជាទូទៅ នៅខែឧសភា កម្ពុជា តែងមានចលនាទឹកបឡើងបន្តិចបន្តួចតាមរយៈភ្លៀងធ្លាក់។ប៉ុន្តែបើជំនន់ខ្លាំង គឺចាប់ពីខែកក្កដាទៅ ។ ឆ្នាំនេះ នៅស្ថានីយចតុមុខ ទឹកអាចឡើង ១០,០៥ម៉ែត្រ កម្រិតនេះ មិនទាន់ដល់ការប្រកាសប្រុងប្រយ័ត្នទេគ្រាន់តែជាជំនន់ធំធម្មតា ប៉ុន្តែបើទឹកឡើងដល់១០,៥០ម៉ែត្រទើបអាច ប្រកាស អាសន្ន ។
សូមជម្រាបថា ឆ្នាំ២០១៨ នេះ រាជរដ្ឋាភិបាលកម្ពុជា បានត្រៀមបម្រុងនូវអង្ករប្រមាណ ១០.០០០តោន ស្រូវពូជ ២ពាន់តោន និងគ្រាប់បន្លែចម្រុះប្រភេទ ប្រមាណ ៥តោនផ្សេងទៀត សម្រាប់ទុកផ្គត់ផ្គង់ដល់ប្រជាពលរដ្ឋដែលស្ថិតនៅ តាមតំបន់ដែលរងគ្រោះដោយធម្មជាតិ៕
