‘
ភ្នំពេញ ៖ សពរបស់អ្នកម្នាង អ៊ុក ផល្លា នឹងត្រូវបូជានៅថ្ងៃពុធ ទី២០ ខែមិថុនា ខាងមុខ និងដោយទទួលបានការយកចិត្តទុកដាក់ពីព្រះរាជវាំង ពិធីគោរពវិញ្ញាណក្ខន្ធ នឹងធ្វើឡើងនៅថ្ងៃទី១៩ ស្អែកនេះ។ នេះជាការបញ្ជាក់បន្ថែមពីលោក យូ ហុកគ្រី។
គណៈកម្មការបុណ្យ បានឲ្យដឹងថា បើទោះជាការបូជាសព ត្រូវបានកំណត់រួចយ៉ាងណាក្ដី តែគណៈកម្មការរៀបចំបុណ្យសពរបស់អ្នកម្នាង ក៏ដូចជាសមាជិកជាន់ខ្ពស់គណបក្សហ្វុនស៊ិនប៉ិច នៅមិនទាន់សម្រេច ថា និងទូលដំណឹងមរណភាពនេះ ទៅសម្ដេចក្រុមព្រះ មុនពេលបូជា ឬយ៉ាងណានោះឡើយ។
សូមជម្រាបថា សពរបស់អ្នកម្នាង អ៊ុក ផល្លា ដែលកំពុងតម្កល់នៅវត្តបទុមវត្តី នឹងត្រូវបូជាតាមទំនៀមទំលាប់នៅថ្ងៃទី២០ ខែមិថុនា នៅសួនមុខវត្តនេះតែម្ដង។ រីឯពិធីបូជាសព មិនទាន់ដឹងឲ្យប្រាកដថា នឹងមានឥស្សរជនណា នឹងមកថ្វាយព្រះភ្លើងនោះឡើយ ហើយសមាជិកគណបក្សហ្វ៊ុនស៊ិនប៉ិច ក៏នៅមិនទាន់សម្រេចចិត្តថា នឹងទូលពីដំណឹងនៃមរណភាពរបស់អ្នកម្នាងឲ្យបានមុនពេលបូជាឬយ៉ាងណានៅឡើយទេ រង់ចាំការពិភាក្សាជាថ្មីទៀតព្រោះថា បារម្ភពីព្រះរាជសុខភាពរបស់ទ្រង់ ចំពោះដំណឹងដ៏សែនរន្ធត់នេះ។ បើតាមការបញ្ជាក់ពីលោក យូ ហុកគ្រី អនុប្រធានគណបក្សហ្វ៊ុនស៊ិនប៉ិច និងជាអនុប្រធានទី១នៃរដ្ឋសភា៕
