ភ្នំពេញ៖ បុរសម្នាក់បាន ចាក់សាំងដុតសម្លាប់ខ្លួនឯងដោយសារតែតូចចិត្តប្រពន្ធរត់ចោល។ទោះជាងណាការប៉ុនប៉ង
ធ្វើអត្តឃាត មិនបានស្លាប់ដូចបំណងឡើយ ដោយប្រជាពលរដ្ឋនាំគ្នាជួយពន្លត់ទាន់តែខ្លួនត្រូវភ្លើងឆេះពេញដងខ្លួន។
ហេតុការណ៍នេះបានបង្កឲ្យមានការភ្ញាក់ផ្អើលឡើង កាលពីវេលាម៉ោង៥និង២០នាទីល្ងាចថ្ងៃទី៨ ខែកក្កដា ឆ្នាំ២០១៨ នៅខាងក្រោយសាលាបឋមសិក្សាជម្ពូវ័នក្នុង ភូមិជម្ពូវ័ន សង្កាត់ចោមចៅ៣ ខណ្ឌពោធិ៍សែនជ័យ ។
បុរសរូបនេះត្រូវបានគេស្គាល់ឈ្មោះ ព្រំ ដាវិន អាយុ អាយុ៣៥ឆ្នាំ ស្នាក់នៅក្នុងភូមិកើតហេតុខាងលើ ចំណែកស្ត្រីជាប្រពន្ធមិនទាន់ស្គាល់ឈ្មោះនៅឡើយ។
តាមប្រជាពលរដ្ឋបានអោយដឹងថា បុរសរូបនេះ ជាមនុស្សញៀនថ្នាំ ហើយកន្លងមកដោយសារឥទ្ធិពលគ្រឿង ញៀន គាត់បានរករឿងវាយធ្វើបាបប្រពន្ធ ទើបប្រពន្ធទ្រាំលែងបាន ក៏សម្រេចចិត្តរត់ចោល ដែលជាហេតុធ្វើឲ្យរូបនោះខូចចិត្ត ចាក់សាំងដុតខ្លួនតែម្តង។
សាក្សីបានអោយដឹងទៀតថានៅមុនពេលកើតហេតុ គេឃើញបុរសរូបនោះ បានទិញសាំងមួយ
ដបមកចាក់ស្រោចខ្លួន ហើយយកដែកកេះដុតខ្លួន បណ្ដាលឲ្យឆាបឆេះយ៉ាងសន្ធោរសន្ធៅ និងប្រកាច់ននៀលលើដីគួរឲ្យសង្វេគព្រឺព្រួច និងរន្ធត់យ៉ាងខ្លាំង។ ភ្លាមៗនោះអ្នកជិតខាងបាននាំគ្នាជួយពន្លត់រហូតភ្លើងរលត់ទៅវិញ ប៉ុន្តែខ្លួនប្រាណបុរសនោះត្រូវភ្លើងឆេះខ្លោចរលួយរលេះយ៉ាងធ្ងន់ធ្ងរ។បុរសរូបនោះត្រូវនគរបាលប៉ុស្ដិ៍ចោមចៅ៣ ហៅរថយន្តសង្គ្រោះអង្គភាព៧១១ ដឹកយកទៅសង្គ្រោះបន្ទាន់នៅមន្ទីរពេទ្យព្រះកុសុមៈ។
បើតាមស្ថានភាពរបួស ត្រូវគ្រូពេទ្យអោយដឹងថា បុរសរូបអាចប្រឈមមុខគ្រោះថ្នាក់ដល់អាយុជីវិត៕
