ភ្នំពេញ ៖ ការបោះឆ្នោតជ្រើសតាំងតំណាងរាស្ត្រ នីតិកាលទី៦ នឹងត្រូវធ្វើឡើងនៅថ្ងៃទី២៩ ខែ កក្កដា ឆ្នាំ២០១៨ ហើយបើគិតត្រឹមថ្ងៃទី២៤ កក្កដានេះ គឺសល់តែ ៥ថ្ងៃទៀតប៉ុណ្ណោះ។ គណៈ កម្មាធិការជាតិរៀបចំការបោះឆ្នោត(គជប) ក៏ដូចជាបណ្តាគណបក្សនយោយបាយដែលបាន ចូលរួមការបោះឆ្នោតនេះបានអំពាវដល់ពលរដ្ឋដែលមានឈ្មោះបោះឆ្នោត ទៅបោះឆ្នោតឲ្យ បានគ្រប់ៗគ្នា ដោយការិយាល័យបោះឆ្នោតទាំងអស់នឹងត្រូវបើកទ្វារទទួលអ្នកបោះឆ្នោតចាប់ ពីម៉ោង ៧ព្រឹក ដល់ម៉ោង ៣រសៀល។

សម្រាប់ការបោះឆ្នោតជាតិឆ្នាំ២០១៨នេះ មានគណបក្សនយោបាយចូលរួមប្រកួត
ប្រជែងចំនួន ២០គណបក្ស និងមានអ្នកបោះឆ្នោតជាង ៨លាននាក់ ដើម្បីជ្រើសតាំងសមាជិក រដ្ឋសភានីតិកាលទី៦ ចំនួន ១២៥រូបតំណាងឲ្យរាជធានី ខេត្តទាំង ២៥ ក្រោមការសង្កេត ការណ៍របស់អ្នកសង្កេតការណ៍ជាតិ និងអន្តរជាតិរាប់ពាន់នាក់។

សូមជម្រាបជូនថា៖ នៅល្ងាចថ្ងៃទី២៤ ខែកក្កដា ឆ្នាំ២០១៨នេះ គណៈកម្មការសម្រប សម្រួលការងារអ្នកសង្កេតការណ៍ជាតិ និងអន្តរជាតិ សម្រាប់ការបោះឆ្នោតជ្រើសតាំងតំណាង រាស្ត្រ នីតិកាលទី៦ ឆ្នាំ២០១៨ នឹងធ្វើពិធីផ្តល់ព័ត៍មានដល់អ្នកសារព័ត៍មានអំពីការចូលរួម របស់អ្នកសង្កេតការណ៍ជាតិ និងអន្តរជាតិ សម្រាប់ការបោះឆ្នោតនាពេលខាងមុខ ដែលពិធី នេះនឹងត្រូវធ្វើឡើងនៅអគារ អិល នៃមជ្ឈមណ្ឌលកោះពេជ្រ វេលាម៉ោង ៥ និង៣០នាទី ដោយក្រុមអ្នកសារព័ត៍មានទាំងអស់ត្រូវបានអញ្ជើញឲ្យចូលរួម៕