ភ្នំពេញ ៖ មន្ទីរពេទ្យជោរី ភ្នំពេញបានសហការជាមួយក្រុមហ៊ុនឱសថ DHG Pharma ( ឌីអេចជី ហ្វាម៉ា ) ប្រចាំកម្ពុជា ពិនិត្យនិងព្យាបាលជំងឺឥតគិតថ្លៃ ជូនប្រជាពលរដ្ឋកម្ពុជាប្រមាណ១ពាន់នាក់ ។ កម្មវិធីពិនិត្យនិងព្យាបាលជំងឺដល់ពលរដ្ឋកម្ពុជា បានធ្វើឡើងកាលពីព្រឹកថ្ងៃទី ២៤ កក្កដា ឆ្នាំ ២០១៨ នៅមន្ទីរពេទ្យជោរីរាជធានីភ្នំពេញ ដោយមានប្រជាពលរដ្ឋជាច្រើននាក់បានចូលរួមមកពិនិត្យជាបន្តបន្ទាប់ ។
លោក សៀក កែវរិន តំណាងក្រុមហ៊ុនឱសថ DHG Pharma បានមានប្រសាសន៍ថា ក្នុងកិច្ចសហការនៅពេលនេះ មិនមែនជាលើកទី១សម្រាប់ក្រុមហ៊ុនឱសថនេះនោះទេ ។ ក្រុមហ៊ុនខ្លួនបានរៀបចំពិនិត្យ និងព្យាបាលជំងឺដល់ប្រជាពលរដ្ឋកម្ពុជាជាច្រើនរយពាន់នាក់ នៅតាមបណ្ដាខេត្តនានា ក្នុងប្រទេសកម្ពុជា ។
លោកបន្តថា សកម្មភាពមនុស្សធម៌ដោយពិនិត្យ និងព្យាបាលជំងឺជូនដល់ប្រជាពលរដ្ឋកម្ពុជា នៅក្នុងពេលនេះគឺដោយសារតែភាគីទាំងពីរ គឺ ក្រុមហ៊ុនឱសថ DHG Pharma និងមន្ទីរពេទ្យជោរីភ្នំពេញ មានចក្ខុវិស័យដូចគ្នា ដើម្បីផ្ដល់អត្ថប្រយោជន៍ដល់ប្រជាពលរដ្ឋកម្ពុជា ។
លោកវេជ្ជបណ្ឌិត ត្រាន់ ថាញ់ទុង ប្រធានចាត់ការទូទៅមន្ទីរពេទ្យជោរៃភ្នំពេញ បានឲ្យដឹងថា កិច្ចសហការគ្នានេះ នឹងជួយដល់ប្រជាជនក្រីក្រ ឱ្យទទួលបានសេវាពិនិត្យ និងព្យាបាល ជាមួយនឹងក្រុមវេជ្ជបណ្ឌិតឯកទេស ព្រមទាំងទទួលបានឱសថ ដែលមានប្រសិទ្ធិភាពខ្ពស់ ដោយឥតគិតថ្លៃ ដែលកម្មវិធីសប្បុរសធម៌នេះ នឹងត្រូវបែងចែករៀបចំធ្វើឡើង ចំនួន១២លើក ក្នុងឆ្នាំ២០១៨ ។
លោកបន្តថា កន្លងមកមន្ទីរពេទ្យជោរី ភ្នំពេញ តែងតែផ្ដល់នូវកម្មវិធីសប្បុរសធម៌បែបនេះ ជូនដល់ប្រជាពលរដ្ឋក្រីក្រពុំមានលទ្ធភាព ពិនិត្យនិងព្យាបាលជំងឺនៅមន្ទីរពេទ្យដែលមានឧបករណ៍ទំនើបដូចមន្ទីរពេទ្យជោរី ដើម្បីបានសេវាកម្មបែបនេះ ។លោកថា នេះជាគឺជាទំនួលខុសត្រូវមួយរបស់មន្ទីរពេទ្យជោរី បង្កើតឡើងក្នុងប្រទេសកម្ពុជា ដើម្បីជួយប្រជាជនកម្ពុជា ៕
