ថៃ ៖ ប្រទេសថៃបានផ្តល់ជំនួយចំនួន ៥លានបាត ឬ ប្រមាណ 147.000ដុល្លារទៅដល់ប្រទេសឡាវ ដែលកំពុងតែប្រឈមទៅនឹងទឹកជំនន់ធ្ងន់ធ្ងរ ដោយសាតែ ការបាក់ទំនប់វារីអគ្គីសនី នៅខេត្តភាគខាងត្បូងប្រទេស។

នាយករដ្ឋមន្ត្រីថៃ លោក ប្រាយុទ្ធ ចាន់អូចា បានផ្តល់ជំនួយជាទឹកប្រាក់សុទ្ធ ចំនួន 147.000ដុល្លារ តាមរយៈ ឯកអគ្គ រដ្ឋទូតឡាវ ប្រចាំប្រទេសថៃ លោក សេង ស៊ូខាត់ធិវុង នៅវិមានរដ្ឋាភិបាល។

បន្ថែមទៅ លើ ទឹកប្រាក់នេះ រដ្ឋាភិបាលថៃ ក៏កំពុងផ្តល់ទឹកសំរាប់បរិភោគ ស្បៀងអាហារ ថ្នាំពេទ្យ និងតង់ផ្លាស្ទីក សំរាប់ជនរងគ្រោះទឹកជំនន់ នៅក្នុងខេត្តអាតាពើ ប្រទេសឡាវ ភាគខាង ត្បូង។ ប្រជាជនរាប់រយនាក់នៅក្នុងភូមិ នៃខេត្តអាតាពើ ត្រូវបានរាយការណ៍ថា បាត់ខ្លួន រាប់ពាន់នាក់រងការប៉ះពាល់ ដោយទឹកជំនន់ធ្ងន់ធ្ងរ បន្ទាប់ពីទំនប់វារីអគ្គីសនី សេពពៀន សេណាម ណយ បានបាក់រលំ នាំមកនូវទឹកជំនន់ភ្លាមៗ បង្ករឡើងដោយទឹកភ្លៀងខ្លាំង៕