ខេត្តក្រចេះ ៖ អាជ្ញាធរខេត្តក្រចេះ បានត្រៀមទីទួលសុវត្ថិភាពជាង២០០កន្លែង ទុកសម្រាប់ជម្លៀស មនុស្ស និងសត្វ ពីការជន់លិច ខណៈជំនន់ទឹកទន្លេមេគង្គត្រូវបានគេមើលឃើញថា កំពុងគំរាមកំហែងធ្ងន់ធ្ងរ ដល់ភូមិដ្ឋាន ជាច្រើន នៅក្នុងតំបន់នានាតាមបណ្តាស្រុកមួយចំនួន នៅក្នុងខេត្តក្រចេះ ដែលមានទីតាំងនៅប្រសព្វ និងដងទន្លេមេគ្គ។
មន្ត្រីសាលាខេត្តក្រចេះ បានឱ្យដឹងនៅថ្ងៃទី៣១ ខែកក្កដា នេះថា អាជ្ញាធរខេត្ត-ស្រុក ក៏ដូច ជាមន្ទីរអង្គភាពពាក់ព័ន្ឋនៅជុំវិញខេត្ត បានត្រៀមលកខណៈ រួចជាស្រេច ដូចជា ស្បៀង ថ្នាំសង្កូវ ព្រមទាំងសម្ភារៈប្រើប្រាស់ផ្សេងៗជួយដល់ពលរដ្ឋដែលប្រឈម ដើម្បីបញ្ជៀស ពីមហន្តរាយធ្ងន់ធ្ងរពីគ្រោះទឹកជំនន់ឱ្យមានសុខសុវត្ថិភាព។ ក្នុងនោះអាជ្ញាធរខេត្ត ក៏បានចេញសេចក្តីប្រកាស ព័ត៌មានឱ្យប្រជាពលរដ្ឋមានការប្រុងប្រយ័ត្នខ្ពស់ចំពោះស្ថានភាពទឹកជំនន់ដែលនឹងអាចជន់ឡើង ដល់កំរិតប្រកាសអាសន្នឱ្យមានការប្រុងប្រយ័ត្ន និងបានបញ្ជាឱ្យកងកម្លាំងប្រដាប់អាវុធ ទាំង៣ប្រភេទ ត្រៀមលក្ខណៈឱ្យបានគ្រប់គ្រាន់ដើម្បីជួយសង្គ្រោះ។
ខេត្តក្រចេះ មានស្រុកចំនួន៥ និងក្រុង១ ក្នុងចំណោមស្រុកទាំង៦ ដែលមានទីតាំង នៅប្របនិងដងទន្លេមេគង្គ រួមមាន ក្រុងក្រចេះ ស្រុកសំបូរ ស្រុកចិត្របុរី ស្រុកឆ្លូង និងស្រុកព្រែកប្រសព្វ គឺកំពុងតែប្រឈមនិងការជន់លិចកាន់តែធ្ងន់ធ្ងរទៅៗពីមួយថ្ងៃទៅមួយថ្ងៃ។ ក្នុងនោះមានភូមិដ្ឋាន រាប់រយខ្នងកំពុងយាយីដោយការជន់លិច ក៏បានចាប់ផ្តើមជម្លៀស សម្ភារៈគោ ក្របី ជ្រូក មាន់ ទា ចេញពីភូមិទៅកាន់ទីទួលសុវត្ថិភាពជាបណ្តើរៗទៅហើយដែរ។
ពលរដ្ឋនៅស្រុកចិត្របុរី សម្តែងការព្រួយបារម្ភនៅពេលស្ថានភាពទឹកជំនន់កំពុងតែមាន សន្ឋឹកជន់ឡើងកាន់តែខ្លាំងបែបនេះ។ ការបារម្ភរបស់ពួកគាត់ផ្តោតសំខាន់លើបញ្ហាសុខភាព អនាម័យ ពិសេសការរីករាលដាលជម្ងឺឆ្លងទាំងមនុស្សនិងសត្វ ជាងនេះទៅទៀតនោះគឺការ បារម្ភពីការខាតបង់ទិន្នផលកិសកម្មដែលពួកគាត់បានដាំដុះនិងសម្រេចប្រមូលផលមុនរដូវហុចផល។ ក្នុងនោះមានដំណាំកសិកម្មរបស់អ្នកភូមិជាច្រើនហិកតា មាន ពោត ដំឡូង សណ្តែក ល្ងរ ត្រូវបានលិចលង់។ក្នុងនោះក៏មានលំនៅឋានរាប់រយខ្នងផ្ទះ និងផ្លូវលំនានាចំនួនរាប់ពាន់ មែត្រព្រមទាំងសាលារៀន និងមណ្ឌលសុខភាពបានរងការលិចលង់ផងដែរ។
ជុំវិញស្ថានភាពទឹកជំនន់នេះ មន្ត្រីសាលាខេត្តក្រចេះ ក៏បានឱ្យដឹងថា ខេត្តក្រចេះ នឹងធ្វើការ ប្រកាសអាសន្ននៅពេលកំពស់ទឹកមានកំរិត ២២មែត្រ ខណៈនៅថ្ងៃទី៣១ ខែកក្កដា នេះ កំរិតទឹក ទន្លេ មេគង្គ នៅមានកំពស់ជាង ២១មែត្រ ដែលកំពស់នេះ គឺជិតដល់នឹងងកំរិតប្រកាសអាសន្ន៕
