ភ្នំពេញ ៖ ទោះបីទើបចូលប្រឡូកក្នុងសិល្បៈបានមួយរយៈពេលខ្លីក៏ដោយ តែតារាសម្តែងស្រីកញ្ញាឡុង ថាវរី ហៅ ម៉ារី អាចទទួលបានតំណែងជាតួឯកស្រីក្នុងខ្សែភាពយន្តខ្នាតធំថ្មីរបស់ផលិតកម្ម LD Picture ។
កាលពីព្រឹកថ្ងៃទី២០ ខែមេសា នៅស្នាក់ការផលិតកម្ម LD Picture ក្នុងបុរី លឹម ឈាងហាក់ ភូមិម៉ល សង្កាត់ដង្កោខណ្ឌដង្កោដោយមានតារាសម្តែងថ្មីចាស់ជាច្រើនចូលរួម ក្នុងកម្មវិធីក្រុងពាលីថតខ្សែភាពយន្តថ្មីរឿង”ឪពុក២នាក់”ឬ”2 Fathers”ប៉ុន្តែ មិនមានវត្តមានអ្នកសារព័ត៌មានចូលរួមក្នុងកម្មវិធីនេះទេ។
ខ្សែវីដេអូនេះមាន តារាសម្តែងស្រីវ័យក្មេង ម៉ារី ត្រូវបានគ្រងតំណែងជាតួឯកស្រីក្នុងរឿងនេះដោយតំណែងតួឯកប្រុសនៅតែ គ្រងដោយតារាកំប្លែងនាយគ្រឿន។
ការទទួលបានតំណែងតួឯករបស់កញ្ញា ម៉ារី ត្រូវបានក្រុមអ្នកសិល្បៈដែលចូលរួមសម្តែងក្នុងខ្សែភាពយន្តនេះ ខ្សឹបប្រាប់ថា មាននាយពែកមី ដែលគេនិយាយថាធ្លាប់មានទំនាក់ទំនងក្រៅឆាកជាអ្នកនិពន្ធ និង ដឹកនាំរឿង គឺជាអ្នកយោងនាង។
បើតាមរូបសម្រស់កញ្ញា ម៉ារី ដូចជាមិនមានបញ្ហាទេចំពោះតំណែងនេះ ប៉ុន្តែបារម្ភលើទេពកោសល្យនៃការសម្តែងរបស់នាងនៅមិនទាន់ដើរដល់កម្រិតតារាសម្តែងលំដាប់ ជួរមុខមួយចំនួនដែលផលិតកម្មនេះធ្លាប់ហៅមកសម្តែង ហើយ សូម្បីតែតារាសម្តែង សុខ សោម៉ាវត្តី ដែលចូលរួមសម្តែងក្នុងខ្សែភាពយន្តនេះបានត្រឹមតំណែងជាតួរងប៉ុណ្ណោះ ។
ប្រភពបញ្ជាក់ដែរថា នាយ ពែកមី និង កញ្ញា ម៉ារី ធ្លាប់មានអនុស្សារីយ៍ជាច្រើនជាមួយគ្នារួមទាំងធ្លាប់រួមគ្នាក្នុង ហេតុការណ៍គ្រោះថ្នាក់ចរាចរនៅខេត្តកំពតកាលពីដើមខែវិច្ឆិកា ឆ្នាំ២០១៤ផងដែរ។ ប្រភពបញ្ជាក់ដែរថាក្រៅពីដើរតួឯកក្នុងរឿងនេះ កន្លងមក តារាសម្តែង កញ្ញា ម៉ារី ក៏ធ្លាប់ត្រូវបាននាយពែកមីលើកស្ទួយក្នុងការសម្តែងក្នុងបទចម្រៀង ថ្មីរបស់នាយក្នុងផលិតកម្មថោន ដូចជាបទ”ទឹកហូរវូៗ”ជាដើម។
គេនៅមិនទាន់អាចស្វែងរកការបញ្ជាក់ពីតារាកំប្លែងនាងយពាក់មី និង តារាសម្តែង កញ្ញា ម៉ារី បាននៅឡើយទេជុំវិញការលើកឡើងខាងលើ។ ប៉ុន្តែ តារាសម្តែងម្នាក់បាន លើកឡើងថា ពិធីក្រុងពាលីដែលមិនមានវត្តមានអ្នកសារព័ត៌មានដូចរាល់ដងនោះគឺ ដោយសារការមិនចង់ឲ្យមានការជជីកសួរអំពីការលើកមុខមាត់ កញ្ញា ម៉ារី ឲ្យទទួលតំណែងតួឯកនេះ។ អ្វីដែលសំខាន់គឺដោយសារតែនាយពែកមីនៅតែមានអារម្មណ៍មិនពេញចិត្តនឹង អ្នកសារព័ត៌មានជុំវិញការផ្សព្វផ្សាយរឿងគ្រោះថ្នាក់ចរាចរណ៍កាលពី ចុងឆ្នាំ២០១៤នោះ។
គួរបញ្ជាក់ដែរថា រឿង ”ឪពុក២នាក់” ឬ “2 Fathers” គឺជាស្នាដៃនិពន្ធនិងដឹកនាំរឿងទី២ របស់នាយពាក់មី បន្ទាប់ពីរឿង “បងប្អូន២នាក់ៗឬ” 2 Brothers” ។
ខ្សែភាពយន្តនេះមានការចូលរួមសម្ដែងដោយតារាល្បីៗ ជាច្រើន រួមមាន លោក ទេព រិន្ទដារ៉ូ លោក ជា សំណាង លោក ហម ឈរ៉ា អ្នកនាង ប៉ែន សុផានី នាយ ពាក់មី នាយគ្រឿន កញ្ញា ឡុង ថាវរី ហៅ ម៉ារី កញ្ញា វណ្ណ វល័ក្ខ លោក សុវណ្ណ រិទ្ធី ហៅ តាវ៉ិចទ័រ កញ្ញា លីឡា លោក BIG អ្នកនាង សុខ សោម៉ាវត្តី ព្រមទាំងតារា កំប្លែង និង តារាសម្ដែងល្បីៗជាច្រើនដួង ផងដែរ។
គ្មានប្រភពព័ត៌មានណា អាចបញ្ជាក់ពីខ្លឹសារសាច់រឿង ពីផលទុនក្នុងការផលិត និងពីរយះពេលនៃការថតឲ្យបានច្បាស់លាស់នោះឡើយ៕ខ រ
