សម្តេចតេជោប្រកាសបង្កើតវេទិកាពិគ្រោះយោបល់ជាមួយបក្សនយោបាយ
ភ្នំពេញ ៖ សម្តេចតេជោ ប្រធានគណបក្សប្រជាជនកម្ពុជា ដែលទើបជាប់ឆ្នោតបន្តធ្វើជានាយករដ្ឋមន្ត្រី បានប្រកាសពីបំណងក្នុងការបង្កើតវេទិកាពិគ្រោះយោបលល់ជាមួយបណ្តាគណបក្សនយោបាយនានាដែលបានចូលរួមការបោះឆ្នោត នៅអាណត្តិទី៦នេះ។
បើយោងតាមការថ្លែងរបស់សម្តេចតេជោ គឺការធ្វើយ៉ាងដូច្នេះ គឺដើម្បីប្រមូលធាតុផ្សំនានាជួយអភិវឌ្ឍន៍ប្រទេសកម្ពុជាទាំងអស់គ្នា និងកុំឱ្យគណបក្សរបស់សម្តេច «ជិះសេះលែងដៃ»។
សម្ដេចតេជោ ហ៊ុន សែន សង្កត់ធ្ងន់ថា សម្ដេចចង់យកអាណត្តិទី៦ នេះ ជាអាណត្តិនៃធនធានខួរក្បាល ជាមួយគ្នានេះ សម្ដេច ហ៊ុន សែន បានលើកឡើងថា នាពេលខាងមុខ សម្ដេចអាចនឹងអញ្ជើញធនធានមនុស្សពីគណបក្សដទៃ ដើម្បីមកធ្វើជារដ្ឋលេខាធិការ អនុរដ្ឋលេខាធិការ ឬទីប្រឹក្សារាជរដ្ឋាភិបាល ក្រសួង ឬស្ថាប័ននានាផងដែរ៕
