ភ្នំពេញ៖អង្គភាពប្រឆាំងអំពើពុករលួយ (អ.ប.ព) កាលពីព្រឹកថ្ងៃទី៣០ ខែមេសា ឆ្នាំ២០១៥ បានជួបពិភាក្សាជាមួយ អនុព័ន្ធច្បាប់នៃការិយាល័យសហព័ន្ធស៊ើបអង្កេត (FBI) ដើម្បីប្រយុទ្ធប្រឆាំងអំពើពុករលួយ ជាពិសេសលើការងារស៊ើបអង្កេតការលាងសម្អាតប្រាក់ ក្នុងកម្រិតមូលដ្ឋាននិងកម្រិតមធ្យមនៅប្រទេសកម្ពុជា។
កិច្ចពិភាក្សានេះ បានធ្វើឡើងនៅអង្គភាពអ.ប.ព រវាងលោកឱម យ៉ិនទៀង ទេសរដ្ឋមន្ត្រី ប្រធានអង្គភាពប្រឆាំងអំពើពុករលួយ ជាមួយនឹងលោក John Sapiniso ជាអនុព័ន្ធច្បាប់នៃការិយាល័យសហព័ន្ធស៊ើបអង្កេត (FBI) របស់សហរដ្ឋអាមេរិក ប្រចាំនៅកម្ពុជា។
ប្រធាន អ.ប.ព លោក ឱម យ៉ិនទៀង បានមានប្រសាសន៍ថា ជំនួបនេះ ធ្វើឡើងក្នុងគោលបំណងកិច្ចសហប្រតិបត្តិការរវាងស្ថាប័ន FBI ជាមួយអ.ប.ព ដោយផ្តោតលើចំណុចសំខាន់ជាអាទិភាពការប្រឆាំងនូវហិរញ្ញប្បទានភេរវកម្ម និងការសម្អាតប្រាក់។
អង្គភាពប្រឆាំងអំពើពុករលួយ មានមុខងារទី១ គឺការប្រឆាំងការសម្អាតប្រាក់ និងទី២ នឹងមានការសហការកិច្ចប្រតិបត្តិការយ៉ាងស៊ីជម្រៅថែមទៀត រវាង FBI និងអ.ប.ព ពាក់ព័ន្ធទៅនឹងការប្រយុទ្ធប្រឆាំងអំពើពុករលួយ។ នៅសហរដ្ឋអាមេរិក ស្ថាប័នដែលធ្វើផ្តាច់មុខលើអំពើពុករលួយគឺ FBI ប៉ុន្តែនៅកម្ពុជា គឺមានអ.ប.ព ហើយកន្លងមកអ.ប.ព ក៏ធ្លាប់ទទួលបានជំនួយពី FBI ក្នុងការបើកវគ្គបណ្តុះបណ្តាលជាច្រើនលើក ក្នុងប្រទេសលើការងារស៊ើបអង្កេត ការលាងសម្អាតប្រាក់។
លោកឱម យ៉ិនទៀង បានមានប្រសាសន៍ទៀតថា ដោយថ្មីៗនេះអ.ប.ពទើបតែមានការនិយាយគ្នាច្បាស់នៅកម្រិតថ្នាក់លើ ប្រគល់ឲ្យបានច្បាស់លាស់ថា អង្គភាពប្រឆាំងអំពើពុករលួយធ្វើការសម្អាតប្រាក់ ទើបតែ២-៣ខែនេះ ហើយក៏ត្រូវមានការសហការល្អ ពីព្រោះការប្រឆាំងការសម្អាតប្រាក់ ឬការប្រឆាំងហិរញ្ញប្បទានលុយកាក់របស់ពួកភេរវកម្មនេះ ដាច់ខាតមិនអាចអង្គភាពមួយធ្វើបាន មិនអាចប្រទេសមួយធ្វើបាននោះទេ គឺត្រូវទាមទារការសហការជាច្រើនប្រទេស តាមរយៈបទពិសោធន៍នាពេលកន្លងមក ហើយក៏បានត្រៀមករណីលម្អិតនីមួយៗជាក់ស្តែងពីខាង FBI ផងដែរ។
លោកបន្តថា យើងនឹងសិក្សាថាមើលអំពីការពិភាក្សាមុខសញ្ញាជនសង្ស័យអ្វីខ្លះ ដែលយើងឃើញថា វាត្រូវការជំនួយពីស្ថាប័នអន្តរជាតិ ជួយយើងក្នុងការស៊ើបអង្កេត ព្រោះថា យើងក៏មិនអាចទៅតាមដាននៅខាងក្រៅបានដែរ ប៉ុន្តែនៅខាងក្រៅក៏មិនអាចមកតាមដាននៅកម្ពុជាបានដែរ ប៉ុន្តែបើមុខសញ្ញានៅកម្ពុជាក៏ត្រូវមកពឹងពាក់យើង បើមុខសញ្ញានៅខាងក្រៅយើងក៏ត្រូវពឹងពាក់គេដែរ។
លោកទេសរដ្ឋមន្ត្រី បានបញ្ជាក់ថា ក្នុងជំនួបនេះ យើងបាននិយាយចូលយ៉ាងជ្រៅ ពាក់ព័ន្ធកិច្ចសហ ប្រតិបត្តិការ ការស៊ើបអង្កេតបទក្លែងបន្លំ និងអំពើពុករលួយក្នុងវិស័យសាធារណៈ ការសម្អាតប្រាក់ សុច្ចរិតភាពសាធារណ…៕
