ភ្នំពេញ ៖ ការដែលលោក នុត ពុធដារ៉ា អភិបាលខណ្ឌដង្កោ ផ្ញើសារទៅសម្តេចតេជោ ទាំងយប់អធ្រាត្រដើម្បីសុំរក្សាដំណែង២ឆ្នាំទៀត នោះ ត្រូវបានមជ្ឈដ្ឋានមួយចំនួនយល់ឃើញថា គឺជាការស្រេកឃ្លានអំណាច និង រក្សាដំណែងដ៏ខ្ពស់មួយនេះ ។
មជ្ឈដ្ឋានជាច្រើន លើកឡើងថា តំណែងជាអភិបាលខណ្ឌនីមួយៗ គឺ ដើម្បីបម្រើប្រជាពលរដ្ឋ មិនមែនក្នុងន័យស្វែងរកលាភសក្ការៈផ្ទាល់ខ្លួនឡើយ ស្របតាមប្រសាសន៍របស់សម្ដេចតេជោនាយករដ្ឋមន្ត្រី ។ ប៉ុន្ដែទិដ្ឋភាពសង្គមជាក់ស្ដែងឃើញថា ដំណែងខ្ពង់ខ្ពស់ គឺពិតជាអាចធ្វើឱ្យពួកគេមានជីវភាពធូរធារតាមមធ្យោបាយផ្សេងៗ ។
ប្រសាសន៍សម្តេចតេជោ កាលពីថ្ងៃទី២៩ ខែសីហា នៅក្នុងកម្មវីធីសំណេះសំណាលជាមួយកម្មករនៅខណ្ឌពោធិ៍សែនជ័យ ស្តីឱ្យលោក នុត ពុធដារ៉ា ខ្លាំងៗហាក់ធ្វើឱ្យលោក នុត ពុធដារ៉ា មានការភិតភ័យ និងបង្កការភ្ញាក់ផ្អើល ក្នុងអង្គកម្មវីធីដែលមានមនុស្សជាង១ម៉ឺននាក់ ចូលរួម ព្រមទាំងអ្នកទស្សនាតាមហ្វេសប៊ុក ផងដែរ។
គិតឱ្យស៊ីជម្រៅ និងល្អត់ល្អន់បន្តិចនឹងយល់ពីប្រសាសន៍សម្តេចតេជោ ថា “មានអ្នកណាដក បានជាស្នើសុំបន្តការងារ២ឆ្នាំទៀត បើសម្តេចអត់ចុះអនុក្រឹត្យផង ។ សម្តេចមានប្រសាសន៍ថា ទោះបីសម្តេចមិនកាន់ក្រសួងមហាផ្ទៃ តែមហាផ្ទៃ ត្រូវឆ្លងកាត់នាយករដ្ឋមន្ត្រី ។ ការតែងតាំងចៅហ្វាយខណ្ឌ ចៅហ្វាយខេត្ត… ត្រូវឆ្លងកាត់នាយករដ្ឋមន្ត្រីទាំងអស់។ ដូច្នេះខ្លឹមសារទាំងនេះ គឺមជ្ឈដ្ឋានមួយចំនួនកាត់ន័យយល់បានថា លោក នុត ពុធដារ៉ា គឺបានសមដូចបំណង ក្នុងការរក្សាដំណែងជាអភិបាលខណ្ឌដង្កោបន្តទៀតបាន ៕
