ប៉ោយប៉ែត ៖ ប្រជាពលរដ្ឋបានរិះគន់ជាខ្លាំងចំពោះសំណង់មួយកន្លែងរបស់លោក អ៊ុយ ឆាយ ឋិតក្នុងភូមិក្បាលស្ពាន១ សង្កាត់ក្រុងប៉ោយប៉ែត ខេត្តបន្ទាយមានជ័យ ដែលគេឃើញកំពុងយកដីផ្លូវប្រើប្រាស់ធ្វើជាកម្មសិទ្ធិរបស់ខ្លួនជាយូរឆ្នាំមកហើយនោះ ត្រូវគេរាយការណ៍ថា បានកើតឡើងដោយសារឃុបឃិតគ្នាជាមួយអាជ្ញាធរ និងសមត្ថកិច្ចជំនាញពាក់ព័ន្ឋមួយចំនួនទៀត។ សំណង់ដែលសង់រំលោភលើដីផ្លូវនោះ ត្រូវបានអ្នកស្រុកប្រាប់ថា មានម្ចាស់ឈ្មោះ អ៊ុយ ឆាយ ភេទប្រុសអាយុ ប្រហែល៤៧ឆ្នាំ រស់នៅភូមិខាងលើ បានយកដីផ្លូវត្រង់ចំណុចផ្លូវពេទ្យនគររាជ្យ មានសណ្ឋានប្លង់ដីស្របតាមបណ្ដោយប្រហែលជា១០០ម៉ែត្រ និងទទឹង២០ម៉ែត្រ។ ប្រភពដដែលបន្ត ថា មិនត្រឹមតែយកដីផ្លូវធ្វើសំណង់រឹងទាំងគ្មានច្បាប់សាងសង់នោះទេ គឺបានយកដីផ្លូវទៅធ្វើអាងហែលទឹក/ស្ទីម និងហាត់ប្រាណ សម្រាប់ធ្វើអាជីវកម្មផ្ទាល់ខ្លួនយូរឆ្នាំមកហើយ ប៉ុន្តែហាក់ដូចជាគ្មានឃើញសមត្ថកិច្ចថ្នាក់ណាមួយចុះមករារាំងនោះឡើយ។
ប្រភពនេះ បញ្ជាក់ថា ទីតាំងនោះ ស្ថិតនៅជាប់នឹងបរិវេណកាស៊ីណូ ដែលបច្ចុប្បន្នដីនៅទីនោះ ហាងឆេងកំពុងតែមានតម្លៃខ្ពស់ ហើយបើសិនជាគេនាំគ្នា«ក្រូម៉េ» ឯកសារឲ្យទៅជាដីស្របច្បាប់វិញនោះ គឺមានតម្លៃរាប់លានដុល្លារឯណោះ។ បច្ចុប្បន្ន លោក អ៊ុយ ឆាយ បានចាប់ផ្តើមសង់អាគារថ្មីទៀត រំលោភយកដីផ្លូវនេះ ដែលសង្ស័យសង់សណ្ឋាគារជួលឲ្យជនបរទេសបន្ថែមចំណូល ។
ពាក់ព័ន្ធនឹងករណីនេះ លោកអភិបាលក្រុង សាន ស៊ានហូ បញ្ជាក់ថា ដីរបស់លោក អ៊ុយ ឆាយ ដែលរំលោភយកដីផ្លូវនោះ គេសង្ស័យមានការពាក់ពន្ធ និងអភិបាលក្រុងចាស់ដែលបានផ្លាស់តំណែងទៀតផង ។ បើដូច្នេះមែន មិនដឹងថា លោក សាន ស៊ានហូ អភិបាលក្រុងទើបកាន់តំណែងក្រោយនេះ ក្លាហានក្នុងការចាត់វិធានការលើករណីរំលោភដី សម្បត្តិសាធារណៈរបស់រដ្ឋដែរឬទេ?
ទាក់ទិននឹងករណីនេះដែរ លោក អ៊ុយ ឆាយ ដែលជាម្ចាស់សំណង់លើដីផ្លូវដូចបានរៀបរាប់ខាងលើ បានប្រាប់តាមទូរស័ព្ទដោយបដិសេធថា លោកមិនដឹងទេ ឃើញបែបណាផ្សាយនបែបនេះទៅ ?
ចំណែកលោកចៅសង្កាត់ប៉ោយប៉ែត ភោគ លន ប្រាប់តាមទូរស័ព្ទថា លោកមិនទាន់បានទទួលព័ត៌មានទេ។ លោកថា ចាំលោករាយការណ៍ទៅក្រុង ឲ្យខាងផ្នែកសំណង់គេចុះទៅពិនិត្យ។
រីឯលោកប្រធានសូរិយោដីខេត្តបន្ទាយមានជ័យ លោក ប្រាក់ ប៉ូលី វិញ លោកថា លោកមិនបានដឹងព័ត៌មាននេះទេ តែទាក់ទងទៅនឹងលើផ្លូវសាធារណ: គីអាជ្ញាធរមូលដ្ឋានមុនគេដែលជាអ្នកទទួលខុសត្រូវ តែបើអាជ្ញាធរឆ្លើយថាមិនដឹងទៅហើយនោះ បន្តិចទៀតគេនឹងសង់បិទផ្លូវជាតិមិនខាន ចំណែកលោកខាងសូរិយោដី មានសមត្ថកិច្ចត្រឺមទទួលខុសត្រូវលើផ្នែកបច្ចេកទេសសាងសង់ប៉ុណ្ណោះ ។
យ៉ាងណាក៏ដោយ សំណង់របស់លោក អ៊ុយ ឆាយ ទាំងសំណង់ចាស់ ទាំងសំណង់ថ្មីនៅលើផ្លូវខាងលើនេះ បានកើតមានយូរឆ្នាំមកហើយ និងបានបើកប្រកបអាជីវកម្មយ៉ាងគគ្រឹកគគ្រេងថែមទៀតផង ប៉ុន្តែមិនដឹងថា មានមូលហេតុអ្វីបានជាសមត្ថកិច្ចគ្រប់ថ្នាក់ក្នុងមូលដ្ឋាននេះ ឆ្លើយថាមិនដឹងគ្រប់គ្នា ដោយរុញដាក់គ្នាទៅវិញទៅមកបែបនេះ ហើយមន្ត្រីខ្លះបែរជា និយាយរាក់កំភែលថា ចាំធ្វើរបាយការណ៍ទៅថ្នាក់លើសិន ដោយទុកឱកាសឲ្យគេសាងសង់
យ៉ាងរំភើយ ឬក៏មានអ្វីនៅជ្រកពីក្រោយឆាករបស់លោក អ៊ុយ ឆាយ នេះទេដឹង ? ដែលគួរតែលោកអភិបាលខេត្ត បន្ទាយមានជ័យ និងអង្គភាពប្រឆាំងអំពើពុករលួយ រូតរះស៊ើបអង្កេតរឿងនេះឡើងវិញផង៕
