កំពង់ស្ពឺ ៖ ឧទ្ធម្ភាគចក្រមួយគ្រឿងរបស់ជនបរទេស មិនស្គាល់ឈ្មោះ បានបង្ខំចុះចតដែលទំនងជាដោយសារតែអាកាសធាតុដ៏អាក្រក់មួយ កាលពីល្ងាចថ្ងៃទី០២ ខែកញ្ញា ឆ្នាំ២០១៨ ក្នុងទឹកបឹងស្រែស្រូវ ក្នុងភូមិតាំងក្រសាំង ឃុំព្នាយ ស្រុកសំរោងទង ខេត្តកំពង់ស្ពឺ។
ប្រជាពលរដ្ឋនៅកន្លែងនោះ បានប្រាប់ក្រុមអ្នកព័ត៌មាននៅ ប្រចាំខេត្តកំពង់ស្ពឺ អោយដឹងថា មូលហេតុដែលនាំឲ្យឧទ្ធម្ភាគចក្របង្ខំចុះចតយ៉ាងដូច្នេះ សង្ស័យមានបញ្ហាជួបព្យុះ និងភ្លៀងយ៉ាងខ្លាំងក្នុងពេលហោះហើរ ឬមានបញ្ហាផ្នែកបច្ចេកទេស។
ប្រភពដដែលបានបន្តថា នៅមុនពេលចុះចត ឧទ្ធម្ភាគចក្រនេះ ហាក់បើកឃ្លីងឃ្លោងពេលហោះហើរ លើតំបន់បឹងអូរក្រាំងអំបិល ដោយស្របពេលនោះមានភ្លៀង និងខ្យល់ខ្លាំងស្ទើរមិនអាចមើលគ្នាឃើញ។ ភ្លាមៗនោះប្រជាពលរដ្ឋក៏បានរាយការតាមទូរស័ព្ទ ទៅសមត្ថកិច្ចឲ្យតាមមើលអំពីការវិវឌ្ឍ នៃដណើរការហោះហើររបស់ឧទ្ធម្ភាគចក្រនេះ ដោយក្តីបារម្មណ៍ និងបន្តតាមដានថែមទៀត រហូតដល់ពេលដែល ឧទ្ធម្ភាគចក្រនេះ បានចុះចតដោយបង្ខំដើម្បីជៀសផុតពីគ្រោះថ្នាក់ផ្សេងៗ។
ចំពោះរូបភាពដែលទទួលបានពីប្រជាពលរដ្ឋនៅកន្លែងចុះចតនោះ យើងមិនដឹងថា អ្នកបើកបរឧទ្ធម្ភាគចក្រនោះមានឈ្មោះអ្វី និងជាជនជាតិអ្វីនៅឡើយទេ ។ នៅ ក្រោយពេលស្ថានភាពអាកាសធាតុបានធូរស្រាល បន្តិចក៏ហោះឡើងទៅវិញបាត់ទៅ ដោយគ្រាន់តែដឹងថា ជាបរទេសតែម្នាក់ឯងប៉ុណ្ណោះ។
បើតាមប្រភពពីសមត្ថកិច្ចស្រុកសំរោងទងបាននិយាយអោយដឹងថា ការចុះចតនេះ ដោយសារតែជនបរទេសរូបនោះឃើញស្រូវល្អពេក ក៏ចុះមកពិនិត្យមើលនោះទេ រួចហើយក៏ហោះហើរទៅវិញបាត់ទៅ៕
