ភ្នំពេញ ៖ សមាជិកនៃឧត្ដមក្រុមប្រឹក្សាពិគ្រោះ និងផ្ដល់យោបល់បានជួបប្រជុំផ្ទៃក្នុងប្រចាំខែរបស់ខ្លួនជាលើកដំបូង កាលពីថ្ងៃទី២៧ កញ្ញា នៅទីស្តីការគណៈរដ្ឋមន្ត្រី ដើម្បីស្វែងយល់ពីគ្នារវាងសមាសភាពដែលមកពីគណបក្សផ្សេងៗគ្នា និងបានលើកឡើងពីបញ្ហាមួយចំនួន ក្នុងនោះក៏មានបញ្ហាជម្លោះ ដីធ្លី និងការចាក់ដីលុបឆ្នេរសមុទ្រផងដែរ ប៉ុន្តែមិនទាន់មានការសម្រេចបែបណានៅឡើយទេ។
ជំនួបពិភាក្សានេះធ្វើឡើងបន្ទាប់ពីសមាជិកឧត្តមក្រុមប្រឹក្សាពិគ្រោះ និងផ្ដល់យោបល់មួយចំនួនបានចុះទៅធ្វើការស្រាវជ្រាវលើបណ្តឹងផ្សេងៗ បន្ទាប់ពីពួកគេបានទទួលពីពលរដ្ឋ ដើម្បីផ្តល់យោបល់ និងលើកសំណើទៅកាន់ប្រមុខរាជរដ្ឋាភិបាល ដើម្បីចាត់វិធានការដោះស្រាយ។
សូមជម្រាបថា ឧត្ដមក្រុមប្រឹក្សាពិគ្រោះ និងផ្ដល់យោបល់ត្រូវបានបង្កើតឡើងកាលពីថ្ងៃទី ១៦ ខែសីហាឆ្នាំ ២០១៨ ដោយមានសមាសភាពចូលរួមពីគណបក្សចំនួន១៦ ដែលមិនមាន អាសនៈក្នុងសភា ដោយប្រធានគណបក្សទាំងនីមួយៗ ត្រូវផ្តល់ឋានៈស្មើទេសរដ្ឋមន្ត្រី៕
