កំពង់ធំ៖រថយន្តស៊េរីខ្ពស់ពាក់ស្លាកលេខ ខ ម មួយគ្រឿង កាលពីថ្ងៃទី០៧ ខែឧសភា ឆ្នាំ២០១៥ នៅវេលាម៉ោង១០និង៣០នាទីយប់ ត្រូវសមត្ថកិច្ចស្ទាក់ចាប់នៅមុខទីស្នាក់ការអាវុធហត្ថស្រុកបារាយណ៍ ខណៈដែលរថយន្តនេះ ដឹកឈើក្រញូងចេញពីខេត្តព្រះវិហារ ឆ្ពោះទៅភ្នំពេញ។
លោក អ៊ិត សុធា ព្រះរាជអាជ្ញាអមសាលាដំបូងខេត្តកំពង់ធំបានបញ្ជាក់ថា រថយន្តទំនើបម៉ាកធុនត្រា ពណ៌ស ពាកស្លាកលេខ ខ.ម មួយគ្រឿង ត្រូវស្ទាក់ចាប់បានបន្ទាប់ពីទទួលបានព័ត៌មានភ្លាម ករណីមានរថយន្តដឹកឈើក្រញូងខុសច្បាប់ ដែលពាក់ផ្លាកលេខ ខេមរភូមិន្ទ ២-៤១៨៨ ដែលមានបិតលោហ្គោអគ្គបញ្ជាការ ពលធំលេខអន្តរាគមន៍លេខ៣ នៅជាប់នឹងទ្វាររថយន្ត ។បន្ចាប់ពីឃើញ កំលាំងសមត្ថកិច្ចដេញស្ទាក់ចាប់ អ្នកបើកបរ ក៏បើកទ្វារថយន្តចុះរត់បាត់ ដោយសុវត្ថិភាព ទុកឲ្យរថយន្តដែលមិនទាន់ពន្លត់ម៉ាស៊ីន រត់ទៅបុក រថយន្ត១គ្រឿងទៀត បណ្ដាលឲ្យខូចខាតផ្នែកខាងមុខ តែមិនមានមនុស្ស គ្រោះថ្នាក់ឡើយ។ឈើប្រណីតដែលបានឃាត់ទុកមានទំងន់ ១២៧៣គឺឡូក្រាម។
មន្រីមូលដ្ឋានបាននិយាយថា រថយន្ត១គ្រឿងដែលពាក់ស្លាកលេខ ខ.ម ២-៤១៨៨ នេះ គេធ្លាប់ឃើញធ្វើសកម្មភាពដឹកឈើញឹកញាប់ណាស់ មិនថាពេលយប់ ឬថ្ងៃនោះទេប៉ុន្តែមិនដែលមានសមត្ថកិច្ចណាហ៊ានឃាត់ឡើយ ទំនងជាខ្លាចបាត់មុខតំណែង និងយសស័ក្តិ ទើបតែថ្ងៃនេះត្រូវសមត្ថកិច្ចនាំគ្នាឃាត់ចាប់ម្តង។
ទោះជាយ៉ាងនេះក្តី ប្រជាពលរដ្ឋបានរិះគន់ថា សមត្ថកិច្ចគ្មានចេតនាឃាត់ខ្លួនអ្នកបើកបររថយន្តទំនើបដែលដឹកឈើល្មើសនោះទេ បើមានឆន្ទះគឺឃាត់បានភ្លាមៗ ព្រោះគ្មានតៃកុងណារត់លឿនជាងឡាននោះទេ។រហូតមកដល់ពេលនេះ សមត្ថកិច្ចមិនទាន់បង្ហាញអត្តសញ្ញាណម្ចាស់ ឈើនៅឡើយទេ៕ ម៉ានរិន្ន
