សៀមរាប៖អ្នកទេសចរបរទេសចំនួន ៣នាក់ជាថ្មីទៀត ត្រូវបានអាជ្ញាធរអប្សរាឃាត់ខ្លួនពេលកំពុងថតរូបអាក្រាតកាយនៅក្នុងតំបន់ប្រាសាទបុរាណកាលពីថ្ងៃ ទី១០ ខែឧសភា កន្លងទៅ។
លោក ឡុង កុសល ប្រធាននាយកដ្ឋានផ្សព្វផ្សាយរបស់អាជ្ញាធរអប្សរា មានប្រសាសន៍កាលពីល្ងាចថ្ងៃច័ន្ទ ទី១១ ខែឧសភា ថា កម្លាំងរបស់អាជ្ញាធរអប្សរា បានចាប់ខ្លួនស្ត្រីអ្នកទេសចរបរទេសម្នាក់ និងប្រុស ២នាក់ ដែលបានថតរូបអាក្រាតកាយនៅក្នុងបរិវេណប្រាសាទតាព្រហ្ម កាលពីរសៀលថ្ងៃអាទិត្យ ទី១០ ខែឧសភា កន្លងទៅ គឺជនជាតិអ៊ីតាលីម្នាក់ ជនជាតិហុឡង់ដ៍ ម្នាក់ និងអាហ្សង់ទីនម្នាក់។
នេះជាលើកទី៣ហើយ ដែលសមត្ថកិច្ចបានចាប់ខ្លួនទេសចរបរទេសពាក់ព័ន្ធនឹងការថតរូប អាក្រាតកាយ នៅក្នុងតំបន់ប្រាសាទបុរាណនៃខេត្តសៀមរាប។ កាលពី ៣-៤ខែមុន សមត្ថផកិច្ចធ្លាប់បានឃាត់ខ្លួនបុរសជនជាតិបារាំង ២រូប និងស្ត្រីជនជាតិអាមេរិកាំង ២រូប ពាក់ព័ន្ធនឹងការថតរូបអាក្រាតនៅក្នុងតំបន់ប្រាសាទបុរាណដែរ៕
