ភ្នំពេញ ៖ រយៈពេល ២ថ្ងៃដំបូងនៃការចុះឈ្មោះបោះឆ្នោត គិតត្រឹមម៉ោង ៦ល្ងាច ថ្ងៃទី២ ខែតុលា ឆ្នាំ២០១៨ មានចំនួនអ្នកចុះ ឈ្មោះបោះឆ្នោតថ្មី ១០.២៦១នាក់ ដែលស្មើនឹងជាង ២% នៃចំនួនប្រជាពលរដ្ឋត្រូវចុះឈ្មោះថ្មីក្នុង ឆ្នាំនេះ។
លោក ឌឹម សុវណ្ណារុំ សមាជិក និងជាអ្នកនាំពាក្យ គ.ជ.ប. បានស្នើឲ្យប្រជាពលរដ្ឋដែលមិនទាន់ចុះឈ្មោះបោះឆ្នោត រួសរាន់ទៅចុះឈ្មោះនៅតាមឃុំ សង្កាត់របស់ខ្លួន ព្រោះនៅសល់ពេលតែ ១៥ថ្ងៃទៀតទេ។
សូមបញ្ជាក់ថា ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០១៨ បានចាប់ផ្ដើមកាលពីថ្ងៃទី១ ខែតុលា និងបញ្ចប់នៅថ្ងៃទី១៨ ខែតុលា ឆ្នាំ២០១៨ ខាងមុខ។ តាមផែនការ ចំនួនប្រជាពលរដ្ឋ ដែលត្រូវចុះឈ្មោះបោះឆ្នោតថ្មី គឺមានជិត ៤៩ម៉ឺននាក់ ខណៈចំនួនប្រជាពលរដ្ឋ ក្នុងបញ្ជីបោះឆ្នោតឆ្នាំ២០១៧ គឺមានជាង ៨,៣លាននាក់៕
