ភ្នំពេញ ៖ សម្ដេចនាយករដ្ឋមន្ត្រី ហ៊ុន សែន នឹងជួបសំណេះសំណាលជាមួយបេក្ខជនជាប់និទ្ទេស A ចំនួន៤០៨នាក់ ក្នុងការប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០១៨ នៅថ្ងៃទី៨ ខែវិច្ឆិកា ខាង មុខ នាវិមានសន្តិភាព។ នេះបើតាមការឲ្យដឹងពីក្រសួងអប់រំ យុវជន និងកីឡា។
សូមជម្រាបថា សម្រាប់ការប្រឡងសញ្ញាបត្រមធ្យមសិក្សាទុតិយភូមិឆ្នាំនេះ មានសិស្សជាប់និទ្ទេស A ៤០៨នាក់ ចំណែកនិទ្ទេស B ចំនួន ២.២២២នាក់ និទ្ទេស C ចំនួន ៦.០៤១នាក់ និទ្ទេស D ចំនួន ១៥.១៨០នាក់ រីឯនិទ្ទេស E ចំនួន ៥២.១៨៣នាក់។
គួររំលឹកថា កាលពីឆ្នាំ២០១៧ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានផ្តល់រង្វាន់លើកទឹកចិត្តសិស្សានុសិស្សនិទ្ទេស (A)ទាំងអស់ ក្នុងម្នាក់ៗថវិកា ២លានរៀល និង iPad ម្នាក់មួយគ្រឿង ព្រមទាំងប្រាក់កាក់ស្លឹងខ្មែរ (បោះពុម្ពឆ្នាំ ១៥១៤ ដែលបានស្រាវជ្រាវយកពីប្រទេសហូឡង់មកវិញ) ចំនួន១ ជាអនុស្សាវរីយ៍ផងដែរ៕
