ភ្នំពេញ ៖ ផ្លូវល្បឿនលឿន ដែលគ្រោងសាងសង់នៅចុងខែវិច្ឆិកា ខាងមុខនេះ នឹងត្រូវធ្វើលើគ្រឹះថ្មីសុទ្ធសាធដោយមានចម្ងាយសរុបប្រវែង ១៩០ គីឡូម៉ែត្រ ខណៈផ្លូវជាតិលេខ ៤ ដែលកំពុងប្រើប្រាស់បច្ចុប្បន្ន មានចម្ងាយ ២៣២គីឡូម៉ែត្រ។
ផ្លូវថ្មីនេះ ចេញពីភ្នំពេញត្រង់ចំណុចផ្លូវបំបែកទំនប់កប់ស្រូវ មានទទឹង ២៤ម៉ែត្រ ចែកចេញជា ២ គន្លងទៅ ២គន្លងមក ដោយមានសួនច្បារនៅកណ្តាល និងរបងសងខាងសម្រាប់ការពារកុំ ឲ្យសត្វ ឆ្លងកាត់ ដោយប្រើពេលសាងសង់ចំនួន ៤៨ខែ ក្នុងតម្លៃវិនិយោគប្រមាណ ១,៩ពាន់លានដុល្លារ។
លោក វ៉ា ស៊ីមសូរិយា អ្នកនាំពាក្យក្រសួងសាធារណការ និងដឹកជញ្ជូនបានឲ្យដឹងថា ក្រសួងកំពុងធ្វើការយ៉ាងសកម្មជាមួយក្រុមហ៊ុន China Road & Bridge Corporation ដើម្បីជំរុញការចាប់ផ្តើមការសាងសង់ផ្លូវល្បឿនលឿន (Express Way) ដែលតភ្ជាប់ពីរាជធានីភ្នំពេញឆ្ពោះទៅខេត្ត ព្រះសីហនុ ឲ្យបាននៅចុងខែ វិច្ឆិកា ឆ្នាំ២០១៨ នេះ៕
