ភ្នំពេញ ៖ លោក សន កែវ អ្នកនាំពាក្យអគ្គនាយកដ្ឋានពន្ធនាគារបានថ្លែងថា អ្នកទោសប្រមាណ ១០០នាក់ថ្មី ទៀត ទទួលបានការលើកលែងទោស និងបន្ធូរបន្ថយទោសសម្រាប់បុណ្យឯករាជ្យជាតិ និងបុណ្យអុំទូក ខាងមុខ។
លោក សន កែវ បញ្ជាក់ថា « ខ្ញុំមិនប្រាកដថា តើមានសមាជិកអតីតគណបក្សប្រឆាំងមួយចំនួន ឬអត់នោះទេ ពីព្រោះខ្ញុំមិនបានមើលទៅលើរឿងរបស់ពួកគេនោះទេ។ យើងគ្រាន់តែដឹងថា ពួកគេជាអ្នកទោសដែលបានកែប្រែខ្លួនហើយ ដោយមិនពាក់ព័ន្ធនឹងនយោបាយទេ»។
សូមរំលឹកថា កាលពីដើមខែនេះ គណៈកម្មាធិការសម្រាប់ការពិនិត្យការកាត់បន្ថយទោស និងលើកលែងទោសបានពិនិត្យទៅលើសំណើរបស់អ្នកទោសចំនួន ៥២៣នាក់សម្រាប់ការលើកលែងទោស និងបន្ថយទោស ប៉ុន្តែមិនមែនពួកគេទាំងអស់អាចត្រូវបានលើកលែងទោសនោះទេ។
លោក អ៊ុច ពង្ស អគ្គនាយករងនៃអគ្គនាយកដ្ឋានពន្ធនាគារបានថ្លែងកាលពីដើមខែនេះថា បច្ចុប្បន្នមានអ្នកទោសចំនួន ៣១.២២៦ នាក់ទូទាំងប្រទេសក្នុងនោះ ២.៦៦៣ ជាស្ត្រី៕
