ភ្នំពេញ ៖ រថយន្តក្រុមហ៊ុនទេសចរណ៍មួយគ្រឿងបើកបរក្នុងល្បឿនលឿនបានជ្រុលបុកប្តីប្រពន្ធមួយគូរកំពុងជិះម៉ូតូឌុបគ្នាចេញពីធ្វើការបណ្តាលអោយស្លាប់ប្រពន្ធ ប្តីរងរបួសស្រាល ហេតុការណ៍នេះបានកើតឡើងកាលពីវេលាម៉ោង៥នឹង០០នាទី ល្ងាចថ្ងៃទី ២០ ខែ វិច្ឆិកា ឆ្នាំ ២០១៨ ស្ថិតតាមបណ្តោយផ្លូវក្រវាត់ក្រុង (ផ្លូវ៣០ម៉ែត្រ) ក្នុងភូមិទីទុយ សង្កាត់ព្រៃស ខណ្ឌដង្កោ រាជធានីភ្នំពេញ។
តាមសម្តីប្រជាពលរដ្ឋដែលបានឃើញហេតុការណ៍បានអោយដឹងថាមុនពេលកើតហេតុប្តីប្រពន្ធមួយគូរបានជិះម៉ូតូធន់ធំមួយគ្រឿង ម៉ាក MSXពាក់ស្លាកលេខភ្នំពេញ1FD4854 ឌុបគ្នាចេញពីធ្វើការរោងចក្រ ធ្វើដំណើរតាមបណ្តោយផ្លូវ៣០ម៉ែត្រទិសដៅពីកើតទៅលិចក្នុងល្បឿនល្មម ខណៈមកដល់ចំណុចកើតហេតុស្រាប់តែមានរថយន្តក្រុងប្រភេទដឹកភ្ញៀវទេសចរណ៍មួយគ្រឿងពណ៍ទឹកប៊ិចពាក់ស្លាកលេខភ្នំពេញ3B.5112បានបើកបរស្របទិសគ្នាជាមួយម៉ូតូយ៉ាងលឿន ហើយទំនងចាប់ហ្វ្រាំងមិនទាន់ក៏បានជ្រុលល្បឿនបុកម៉ូតូជនរងគ្រោះពីក្រោយពេញទំហឹងបណ្តាលស្ត្រីជាប្រពន្ធដែលជិះពីក្រោយធ្លាក់ពីលើម៉ូតូខ្ទាតចូលក្រោមកង់រថយន្តកិនធ្លាយក្បាលស្លាប់យ៉ាងអាណោចអាធម៌ រីឯប្តីបានរងរបួសស្រាល ចំណែកម៉ូតូត្រូវបានរថយន្តអូសក្រោយរថយន្តជាច្រើនម៉ែត្របណ្តាលឆាបឆេះខ្ទេចតែម្តង ។
សពស្ត្រីរងគ្រោះមានឈ្មោះឆកាហៅយ៉ានអាយុ៣១ឆ្នាំមុខរបរកម្មករនីរោងចក្រស្នាកនៅបន្ទប់ជួលម្តុំផ្សារទួលពង្រសង្កាត់ចោមចៅ០១ខណ្ឌពោធិសែនជ័យ។
ក្រោយហេតុសមត្ថកិច្ចមូលដ្ឋានបានចុះដល់ទីតាំងកើតហេតុសម្រួលចរាចរជូនបងប្អូនប្រជាពលរដ្ឋធ្វើដំណើរនឹងបានទំនាកទំនងទៅមន្ត្រីជំនាញចុះវាស់វែងអូសយករថយន្តបង្កនឹងម៉ូតូទៅរក្សាទុកនៅការិយាល័យចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញរង់ចាំដោះស្រាយនៅពេលក្រោយ ចំណែកសាកសពបានប្រគល់ជូនក្រុមគ្រួសារដឹកយកទៅធ្វើបុណ្យតាមប្រពៃណី ៕
