ភ្នំពេញ ៖ រយៈពេល៣ថ្ងៃ (ថ្ងៃទី២១-២២-២៣ ខែវិច្ឆិកា) នៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ គ្រោះថ្នាក់ចរាចរណ៍ទូទាំងប្រទេសកើតឡើង៣៨លើក បណ្តាលឲ្យស្លាប់១៦នាក់ និងរបួសធ្ងន់ស្រាល៦០នាក់។ នេះបើយោងតាមរបាយការណ៍នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ នៃអគ្គស្នងការនគរបាលជាតិ។
របាយការណ៍ដដែលបន្តថា មូលហេតុដែលនាំឲ្យគ្រោះថ្នាក់រួមមាន៖ ល្បឿន១៤លើក, ស្រវឹង១លើក, ប្រជែង៤លើក, មិនប្រកាន់ស្តាំ៣លើក, មិនគោរពសិទ្ធិ១០លើក, បត់គ្រោះថ្នាក់៥លើក និងកត្ដាយានយន្ដ១លើក បណ្តាលឲ្យខូចខាតម៉ូតូ៤០គ្រឿង, រថយន្តតូច១៥គ្រឿង និងរថយន្តធំ៩គ្រឿង។
របាយការបញ្ជាក់ថា រាជធានី-ខេត្ត ដែលមានគ្រោះថ្នាក់ និងអ្នករងគ្រោះច្រើនជាងគេ រួមមាន៖ ភ្នំពេញ១០លើក ស្លាប់៤នាក់ របួស១៤នាក់, បាត់ដំបង៤លើក ស្លាប់២នាក់ របួសម្នាក់, កំពង់ធំ៤លើក ស្លាប់២នាក់ របួស៧នាក់ និងស្វាយរៀង៣លើក ស្លាប់២នាក់ របួសម្នាក់, បន្ទាយមានជ័យ៣លើក ស្លាប់២នាក់ របួស១នាក់, ព្រះសីហនុ២លើក ស្លាប់២នាក់ របួស៤នាក់ និងត្បូងឃ្មុំ ១លើក ស្លាប់១នាក់ របួស១នាក់៕
