ខេត្តកំពង់ស្ពឺ ៖ ទីតាំងផលិតប្រេងខ្មៅមួយកន្លែងដែលគ្មានច្បាប់ទម្លាប់លួចលាក់ផលិតជាយូរខែ ឆ្នាំណាស់មកហើយនោះ ពេលនេះត្រូវបានកម្លាំងនគរបាលនាយដ្ឋាន ប្រឆាំងបទល្មើសសហការជាមួយកម្លាំងនគរបាលប្រឆាំងបទល្មើសខេត្តកំពង់ស្ពឺ និងមានការសម្របសម្រួលពីលោក អ៊ូ ផាត ព្រះរាជអាជ្ញារងអមសាលាដំបូងខេត្តផងដែរ ប៉ុន្តែម្ចាស់ទីតាំងហាក់បីដូចជាដឹងខ្លួនមុនរត់គេចខ្លួនបាត់ស្រមោល។
ប្រតិបត្តិការនេះ ធ្វើនៅវេលាម៉ោង០១និង៣០នាទី រសៀលថ្ងៃទី២០ ខែធ្នូ ឆ្នាំ២០១៨ នៅចំណុចភូមិដំណាក់ត្រាច ឃុំដំបូករូង ស្រុកភ្នំស្រួច ខេត្តកំពង់ស្ពឺ។
បើតាមមន្ត្រីនគរបាលស្រុកភ្នំស្រួច បាននិយាយអោយដឹងថា នៅមុនពេលចុះបង្ក្រាបទីតាំងផលិត ចម្រាញ់ប្រេងខ្មៅគ្មានច្បាប់ទម្លាប់ខាងលើនេះ ដោយមានការស៊ើបអង្កេតយ៉ាងយក ចិត្តទុកដាក់ទើប កម្លាំងនាយកដ្ឋាននគរបាលប្រឆាំងបទល្មើសសេដ្ឋកិច្ច នៃក្រសួងមហាផ្ទៃបាន សហការជាមួយកម្លាំងការិយាល័យនគរបាលប្រឆាំងបទល្មើសសេដ្ឋកិច្ច អាជ្ញាធរ មន្ទីរសិប្បកម្មឧស្សាហ៍កម្មខេត្តកំពង់ស្ពឺ ដែលដឹកនាំដោយលោកឧត្តមសេនីយ៍ទោ មាស រ៉ាវុធ អនុប្រធាន នាយកដ្ឋាននគរបាលប្រឆាំងបទល្មើសសេដ្ឋកិច្ច និងលោកវរសេនីយ៍ឯក ពីង ពៅ នាយការិយាល័យនគរបាលប្រឆាំងបទល្មើសសេដ្ឋកិច្ចខេត្តកំពង់ស្ពឺនិងមានការសម្រប សម្រួលដោយលោក អ៊ូ ផាត ព្រះរាជអាជ្ញារង នៃអយ្យកាអមសាលាដំបូងខេត្តកំពង់ស្ពឺ។
បន្ទាប់ពីចុះបង្ក្រាបរួច សមត្ថកិច្ចឆែកឆេររកឃើញ រួមមាន ៖
១. ធុងខៀវម៉ាក (Interrox st 50) ចំនួន៥៤ធុង(ក្នុង១ធុងមានចំនួន ៣៥គីឡូក្រាម)
២. ធុងអាសុីតពណ៌ប្រផេះ(គ្មានម៉ាក) ចំនួន ១១០ធុង (ក្នុង១ធុងមានចំនួន១៥គីឡូក្រាម)
៣. ធុងស្តុកប្រេងម៉ាស៊ូតចំនួន ២៤ធុង (ចំណុះ ១ធុង ស្មើ ៤០០លីត្រ)
៤. ស៊ីទែនស្តុកប្រេងម៉ាស៊ូតធំ មានចំនួន៤ (ចំណុះ១៥០០០លីត្រ)
៥. ស៊ីទែនស្តុកប្រេងម៉ាស៊ូតតូច មានចំនួន៣ (ចំណុះ ៣០០០លីត្រ)
៦.រថយន្តចំនួន ៣គ្រឿង គោយន្ត ១គ្រឿងផងដែរ។
បច្ចុប្បន្នវត្ថុតាងខាងលើនេះទាំងអស់ត្រូវបានកម្លាំងសមត្ថកិច្ចជំនាញរឹបអូសកសាងសំណុំរឿងចាត់ការបន្តតាមនិតិវិធី៕
