ភ្នំពេញ ៖ មនុស្ស ៧៣នាក់ ត្រូវបានក្រុមសកម្មជនបណ្ដាញការពារព្រៃឡង់ចាប់ឃាត់ខ្លួន និងរណារយន្តប្រមាណ ១២៣ គ្រឿងត្រូវបានរឹបអូសប្រគល់ឲ្យមន្ត្រីជំនាញបរិស្ថានពាក់ ព័ន្ធបទល្មើសកាប់បំផ្លាញព្រៃឈើ និងកាប់ទន្ទ្រានដីព្រៃនៅក្នុងតំបន់ដែនជម្រកសត្វព្រៃព្រៃឡង់ក្នុងរយៈពេល ១ ឆ្នាំ ២០១៨ នេះ។
នេះបើតាមរបាយការណ៍បូកសរុបលទ្ធផលប្រចាំឆ្នាំ ២០១៨ របស់សហគមន៍បណ្ដាញព្រៃឡង់ដែលភ្នំពេញ ប៉ុស្តិ៍ទទួលបានកាលពីម្សិលមិញ។
ទោះជាបែបណារបាយការណ៍នោះនិយាយថា ជនប្រព្រឹត្តបទល្មើសទាំងនេះមិនត្រូវបានក្រុមមន្ត្រីជំនាញចាប់បញ្ជូនទៅកាន់តុលាការនោះទេ ដោយសំអាងថា «ពួកគេទើបតែប្រព្រឹត្តកំហុសតិចតួចជាលើកដំបូង»
ទាក់ទិននឹងករណីនេះ រដ្ឋលេខាធិការ និងជាអ្នកនាំពាក្យក្រសួងបរិស្ថាន លោក នេត្រ ភក្ត្រា បានប្រាប់ឲ្យដឹងថា បច្ចុប្បន្ននៅទូទាំងប្រទេសមានមន្ត្រីឧទ្យានុរក្សចំនួន ១.២២១ នាក់ ប៉ុន្តែមិនគ្រប់ គ្រាន់ក្នុងការល្បាតសម្រាប់ការការពារ ដើម្បីទប់ស្កាត់ និងប្រយុទ្ធប្រឆាំងនឹងឧក្រិដ្ឋកម្មព្រៃឈើនៅលើផ្ទៃដីព្រៃក្នុងតំបន់ការពារ និងអភិរក្សដែលមានរហូតដល់ ៧,១ លានហិកតានៅទូទាំងប្រទេសនោះទេ៕
