កំពង់ស្ពឺ ៖ មនុស្សម្នាក់បានស្លាប់ និង៨នាក់ទៀតបានរងរបួសក្នុងហេតុការណ៍គ្រោះថ្នាក់ ចរាចរណ៍ ដ៏គួរឲ្យរន្ធត់មួយរវាងរថយន្ដដឹកថ្ម និងរថយន្ដធុនតូចធំ នៅលើកំណាត់ផ្លូវជាតិលេខ៤ ជិតជ្រោះពេជ្រនិល ស្ថិតក្នុងភូមិទី៦ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ នារសៀលថ្ងៃទី៣ ខែមករា ឆ្នាំ២០១៩នេះ បណ្ដាលមកពីរថយន្ដដឹកថ្ម (មិនមែនរថយន្តកុងតឺន័រ) ដាច់ហ្វ្រាំងពេលកំពុងចុះចំណោទ ហើយជ្រុលទៅបុករះរថយន្ដ ២០គ្រឿងផ្សេងទៀត បណ្តាលឲ្យរងការខូចខាត។
លោកឧត្តមសេនីយ៍ទោ សម សាមួន ស្នងការគរបាលខេត្តកំពង់ស្ពឺ បានប្រាប់នៅល្ងាចថ្ងៃទី៣ មករា នេះថា បញ្ហាកកស្ទះចរាចរណ៍ត្រូវបានដោះស្រាយ និងអាចធ្វើដំណើរបាន ទៅជាធម្មតាហើយ ក្រោយពីកម្លាំងសមត្ថកិច្ចបានជួយអន្តរាគមន៍សម្រួលនៅទីនោះ។ យ៉ាងណាក៏ដោយ លោកស្នងការ មិនបានបញ្ជាក់ពីអត្តសញ្ញាណអ្នករងគ្រោះទាំងអស់ រួមទាំងរថយនុ្តធុនធំដឹកថ្មដែលបង្កគ្រើថ្នាក់នោះនៅឡើយទេ៕
