ភ្នំពេញ ៖ ក្រសួងពាណិជ្ជកម្ម គ្រោងរៀបចំដើម្បីនាំយកក្រូចពោធិសាត់របស់កម្ពុជា ទៅចុះបញ្ជីម៉ាកសម្គាល់ភូមិសាស្ត្រនាពេលឆាប់ៗនេះ ដើម្បីការពារផលប្រយោជន៍អ្នកផលិត និង ជួយលើកកម្ពស់ជីវភាពផលិតករឲ្យកាន់តែមានភាពល្អប្រសើរ។

លោក អប រ៉ាឌី ប្រធាននាយកដ្ឋានកម្មសិទ្ធិបញ្ញានៃក្រសួងពាណិជ្ជកម្ម បានថ្លែងថា ការចុះបញ្ជីម៉ាកសម្គាល់ភូមិសាស្រ្ដដល់ក្រូចពោធិ៍សាត់នេះ ដើម្បីជួយទប់ស្កាត់ក្នុងការក្លែងបន្លំប្រភពដើម និងជួយលើកកម្ពស់ជីវភាពដល់ផលិតករម្ចាស់ប្រភពទំនិញ ដើម្បីផ្គត់ផ្គង់ក្នុងស្រុក និងការនាំចេញទៅផ្សាក្រៅប្រទេស ដោយសារប្រទេសមួយចំនួនតម្រូវឲ្យទំនិញមានម៉ាកសម្គាល់ភូមិសាស្ត្រនេះ។

លោក អេប រ៉ាឌី បានបន្តទៀតថា មន្ត្រីក្រសួងពាណិជ្ជកម្មបានចុះទៅបើកសិក្ខាសិលា ផ្សព្វផ្សាយម៉ាកសម្គាល់ភូមិសាស្រ្តទំនិញ អំពីក្រូចពោធិសាត់-បាត់ដំបង ដល់ភាគីពាក់ព័ន្ធ ដើម្បីសិក្សាមុននឹងយកទៅចុះបញ្ជីម៉ាកសញ្ញាសម្គាល់ភូមិសាស្រ្តទំនិញនាពេលអនាគត ដែលនឹងជួយបង្កើនតម្លៃបន្ថែមមួយកម្រិតទៀតដល់ផលិតករ៕