ភ្នំពេញ៖ ពលករខ្មែរចំនួន២៣០នាក់ផ្សេងទៀតដែលបានចាញ់បោកមេខ្យល់ទៅធ្វើការខុសច្បាប់លើទូកនេសាទថៃ ត្រូវបានជួយសង្គ្រោះក្នុងដែនសមុទ្ទនៃប្រទេសឥណ្ឌូណេស៊ីនឹង ត្រូវបញ្ជូនឲ្យវិលត្រឡប់មកកម្ពុជាវិញនៅក្នុងពេលឆាប់ៗខាងមុខនេះ។
លោក កុយ គួង បានឲ្យដឹងកាលពីរសៀលថ្ងៃទី០៤ ខែមិថុនាថា តាមការណែនាំរបស់លោកឧបនាយករដ្ឋមន្ដ្រី ហោ ណាំហុង រដ្ឋមន្ដ្រីការបរទេស និងសហប្រតិបត្តិការអន្តរជាតិ ស្ថានទូកម្ពុជាប្រចាំប្រទេសឥណ្ឌូណេស៊ី បានចាត់មន្ដ្រីការទូតឲ្យចុះទៅធ្វើសម្ភាសន៍អំពីប្រវតិរូបថតរូប និងចុះពិន្យិតជាក់ស្ដែង អំពីស្ថានភាព និង សុខភាពរបស់ពលករខ្មែរទាំងអស់ នៅកោះអំបន់ ខេត្តម៉ាលូគូ ប្រទេសឥណ្ឌូណេស៊ី កាលពីថ្ងៃទី៣០ ខែឧសភា ដល់ថ្ងៃទី០៣ ខែ មិថុនា ឆ្នាំ២០១៥ ដើម្បីបញ្ជាក់ឲ្យ បានច្បាស់លាស់។ ជាក់ស្ដែង ពលករខ្មែរទាំងអស់ បានកើនឡើងពី១៩៩នាក់ ដល់២៣០នាក់។
តាមរបាយការណ៍បានបង្ហាញថា យោងតាមការទាមទាររបស់ស្ថានទូតកម្ពុជា ក្រុមហ៊ុនថៃ បានដោះស្រាយបើកប្រាក់បៀវត្សជូនពលករទាំង២៣០នាក់នេះរួចហើយ មុនពេលបញ្ជូនពួកគេត្រឡប់មកមាតុភូមិវិញ៕K
