ភ្នំពេញ ៖ នៅព្រឹកថ្ងៃទ២៦ ខែកុម្ភៈ នេះ ឆ្មាំពន្ធនាគារបាននាំខ្លួនលោក ឡាយ វណ្ណៈ អតីតអភិបាលខេត្តតាកែវ រួមទាំងអតីតស្នងការខេត្តតាកែវ មកតុលាការរាជធានីភ្នំពេញ ដើម្បីបន្តសវនាការលើសំណុំរឿង ឃាតកម្មសម្លាប់ស្រីស្នេហ៍អ្នកនាង ចេង វឌ្ឍនា កាលពីដើមឆ្នាំ២០១៨ កន្លងទៅ។

មន្ត្រីតុលាការបានប្រាប់បណ្តាញសារព័ត៌មានថា សំណុំរឿងជនត្រូវចោទ ឡាយ វណ្ណៈ និងអ្នកជាប់ពាក់ព័ន្ធ នឹងបន្តជំនុំជម្រះសួរដេញដោល នៅថ្ងៃទី២៦-២៧ ខែកុម្ភៈ ឆ្នាំ២០១៩ គឺពាក់ព័ន្ធសំណុំរឿងឃាតកម្មសម្លាប់ស្ត្រីម្នាក់ នៅចំណុចផ្ទះជួល ភូមិផ្សារតាកោ សង្កាត់រកាក្នុង ក្រុងដូនកែវ ខេត្តតាកែវ កាលពីថ្ងៃទី២៦ ខែមករា ឆ្នាំ២០១៨ ។

គួររម្លឹកថា សំណុំរឿងឃាតកម្មដ៏កក្រើកខាងលើនេះ កន្លងទៅតុលាការបានធ្វើការចោទប្រកាន់ លើជនសង្ស័យចំនួន៤នាក់ រួមមាន លោក ឡាយ វណ្ណៈ អតីតអភិបាលខេត្តតាកែវ, លោក ឡាយ ណារិទ្ធ ស្នងការរងនគរបាលខេត្តតាកែវ ត្រូវជាបងប្រុស លោក ឡាយ វណ្ណៈ ឈ្មោះ ម៉េន សាម៉ៃ អ្នកបើកឡានឲ្យលោក ឡាយ វណ្ណៈ និងឈ្មោះ ជឹម វុធ ហៅ ថូត ជាអ្នកបំរើនៅផ្ទះនាង ចេវ សុវឌ្ឍនា៕