ហាណូយ ៖ កិច្ចប្រជុំកំពូលរវាងមេដឹកនាំកូរ៉េខាងជើង និងសហរដ្ឋអាមេរិក ត្រូវបានរៀបចំឡើងនៅសប្តាហ៍នេះ ក្នុងសណ្ឋាគារដ៏ប្រណីតមួយនារដ្ឋធានីហាណូយ ក្រោមការចាត់ចែងពិធីការដោយអាជ្ញាធរប្រទេសវៀតណាម។

នេះបើយោងតាមការចុះផ្សាយ របស់ទីភ្នាក់ងារសារព័ត៌មាន យុនហាប់ នៅថ្ងៃទី២៧ ខែកុម្ភៈ ឆ្នាំ២០១៩។

ប្រធានាធិបតីអាមេរិកលោក ដូណាល់ ត្រាំ និងមេដឹកនាំកូរ៉េខាងជើង លោក គីម ជុងអ៊ុន គ្រោងរៀបចំកិច្ចប្រជុំអាហារនៅល្ងាចថ្ងៃពុធ នេះ។ តាមការគ្រោងទុក មេដឹកនាំទាំងពីរត្រូវបានគេរំពឹងថា នឹងចូលរួមនៅក្នុងការចរចារពេញលេញ ដែលនឹងប្រព្រឹត្តទៅនៅសណ្ឋាគារ Sofitel Legend Metropole នៅថ្ងៃបន្ទាប់។

ទំនងជាដូចគ្នាទៅនឹងជំនួបលើកមុនដែរ ចេញសេចក្តីថ្លែងការណ៍រួមមួយនឹងត្រូវធ្វើឡើង នៅសណ្ឋាគារនោះ ដើម្បីសរុបលទ្ធផលនៃកិច្ចចរចាទ្វេភាគីប្រសិនបើភាគីទាំងពីរបានព្រមព្រៀងគ្នា៕