ភ្នំពេញ ៖ នៅព្រឹកថ្ងៃទី១៥ ខែមីនា នេះ អ្នកស្រី តាត គីមលន ដែលជាភរិយារបស់អ្នកនិពន្ធជើងចាស់ដ៏ល្បីឈ្មោះលោក គង់ ប៊ុនឈឿន បានមកដល់ប្រទេសកម្ពុជាហើយ ដោយអ្នកស្រីបានអះអាថា នឹងរៀបចំកសាងសំណុំរឿងករណី ការកាឡៃបទចម្រៀងបំពានទៅលើស្នាដៃនិពន្ធបទចម្រៀងដែលជាមរតកដើមរបស់ស្វាមីអ្នកស្រី។

ភរិយាលោក គង់ ប៊ុនឈឿន បានធ្វើដំណើរពីប្រទេស ណកវ៉េ មកដល់ប្រទេសកម្ពុជាហើយ នៅព្រឹកថ្ងៃទី១៥ ខែមីនា ឆ្នាំ២០១៩ នេះ វេលាម៉ោង ៩ ព្រឹក នៅអាកាសយានដ្ឋានអន្តរជាតិភ្នំពេញ។

ក្នុងដំណើរវិលមកកាន់ប្រទេសកម្ពុជាលើកនេះ អ្នកស្រី តាត គីមលន បានមានប្រសាសន៍ថា ដំបូងឡើយ គឺអ្នកស្រី គ្រាន់តែចង់មកកាន់ប្រទេសកម្ពុជា ដើម្បីធ្វើខួបគំរប់ ៣ឆ្នាំនៃមរណភាពដល់ស្វាមីរបស់អ្នក ស្រីតែប៉ុណ្ណោះ។ តែ ដោយសារមានបញ្ហាការលួចចម្លងនូវស្នាដៃរបស់ស្វាមីអ្នកស្រីបែបនេះ ទើបលោក ស្រីធ្វើការសម្រចចិត្តស្វែងររកយុត្តិធម៌ជូនដល់ស្វាមីអ្នកស្រីតែម្ដង។

ទាក់ទងនឹងបញ្ហាសំណងជាលុយកាក អ្នកស្រីបញ្ជាក់ថា វាមិនសំខាន់ស្មើនឹងសំណងទឹកចិត្ត និងស្នាដៃរបស់អ្នកនិពន្ធ ដែលគេបានលួចចម្លង ឬយកទៅកាឡៃនោះទេ អ្នកស្រីថា មានការឈឺចាប់នៅពេលដែលឃើញបញ្ហានេះកើតឡើងជារឿយៗ។

បើតាមការបញ្ជាក់របស់អ្នកស្រី តាត គីមលន ប្រហែលជាសប្តាហ៍ក្រោយអ្នស្រីនឹងត្រៀមជួបជា មួយថ្នាក់ដឹកនាំក្រសួងវប្បធម៌ និងវិចិត្រសិល្បៈ ព្រមទាំងខាងផលិតកម្មដែលលួចចម្លងស្នាដៃ ដើម្បី ដោះស្រាយនៅបញ្ហាដែលកកើតមានឡើង។

សូមបញ្ចក់ថា កន្លងមកអ្នកនិពន្ធដែលលួចចម្លងស្នាដៃភ្លេងរបស់លោក គង្គ ប៊ុនឈឿន បទ« នឹកភូមិភ្នំធំ» បានធ្វើការសុំទោសជាសាធារណៈចំពោះកំហុសរបស់ខ្លួន ប៉ុន្តែទោះបីជាយ៉ាងណា ភរិយាកវី គង្គ ប៊ុនឈឿន នៅតែប្រកាន់គោលចំហររកដំណោះស្រាយ ព្រោះថា អ្នកស្រីបារម្មណ៍ពីការបាត់បង់ នូវស្នាដៃដើមរបស់អ្នកនិពន្ធជំនាន់មុន ពិសេសរបស់ស្វាមីអ្នកស្រី។ ក្នុងនោះ លោកស្រី ក៏បានផ្ដាំផ្ញើទៅកាន់យុវ័យទាំងអស់ ឲ្យយល់ដឹងកាន់តែច្បាស់ពីស្នាដៃរបស់ខ្លួន ដើម្បីបម្រើដល់សង្គមជាតិទាំងមូល។

សូមរំឭកថា កវីម្ចាស់ស្ទឹងសង្កែ គង្គ ប៊ុនឈឿន កើតនៅថ្ងៃ ១៨ ខែតុលា ឆ្នាំ ១៩៣៩ នៅភូមិចំការសំរោង ឃុំចំការសំរោង ស្រុក បាត់ដំបង ខេត្តបាត់ដំបង ។ ឪពុកឈ្មោះ គង្គ ឈិន(ស្រុកកំណើតនៅ ខេត្តតាកែវ) ម្តាយឈ្មោះ ម៉រ ភឹង(បាត់ដំបង) ។ លោកបានចូលប្រឡូកក្នុងវិស័យតែងនិពន្ឋ ចាប់តាំងពីកំឡុងឆ្នាំ ១៩៥៥ មក រហូតបានប្រលងជាប់លេខមួយ ជាលើកដំបូង នៅក្នុង ឱកាសមហោស្រពអក្សរសិល្ប៍មួយ នៅក្នុងខេត្តបាត់ដំបងក្នុងឆ្នាំ១៩៥៧ ក្នុងស្នាដៃឈ្មោះ ” ស្នេហាលុះអវសាន”។

លោកជាអ្នសរសេរកាសែត អ្នកនិពន្ឋ ប្រលោមលោកពាក្យរាយ ប្រលោមលោកពាក្យកាព្យ កំណាព្យ ចម្រៀង សេណារីយ៉ូភាពយន្ត ជាអ្នកដឹកនាំសម្តែង ជាអ្នកនិពន្ឋបទភ្លេង ដ៏ល្បីឈ្មោះម្នាក់។ ក្រៅពីនេះ លោកក៏ជាអ្នកគូរ គំនូរអប់រំផងដែរ។

នៅឆ្នាំ ២០០០ លោកជាអ្នកនិពន្ឋជនជាតិខ្មែរ ទី ២ បន្ទាប់ពី លោក ពេជ្រ ទុំក្រវិល ដែលបានទទួលជ័យលាភី ស្នាដៃតែងនិពន្ឋក្របខណ្ឌអាស៊ាន ។

ព្រឹទ្ធាចារ្យ និងជាអ្នកនិពន្ធជើងចាស់មួយរូប បានផ្តល់ការពិចារណាពាក់ព័ន្ធនឹងការចម្លងស្នាដៃនិពន្ធនេះថា កន្លងមក មិនត្រឹមតែស្នាដៃនិពន្ធបទចម្រៀងទេ សូម្បីស្នាដៃនិពន្ធបែបប្រលោមលោក អក្សរសិល្ប៍គ្រប់ទម្រង់ និងរឿងរ៉ាវឯកសារសំខាន់ៗជាច្រើនទៀតរបស់អ្នកនិពន្ធជំនាន់មុន ក៏ត្រូវបានមនុស្សខ្លះក្នុងជំនាន់នេះ បានឆ្លៀតឱកាសកេងចំណេញធ្វើមានធ្វើបានជាប្រយោជន៍ផ្ទាល់ខ្លួនដោយគ្មានការខ្មាស់អៀនដែរ ហើយក៏គ្មានស្ថាប័នណាមួយចាប់អារម្មណ៍ក្នុងរឿងនេះទ​។

លោកព្រឹទ្ធាចារ្យរូបនេះ បានក្រើនរំលឹកថា យុវវ័យជំនាន់នេះ គួរបង្កើតនូវអ្វីៗដែលជាស្នាដៃរបស់ខ្លួន សម្រាប់ជាគំរូដល់យុវវ័យជំនាន់ក្រោយ ហើយសង្គមទាំងមូលក៏ល្មមដល់ពេលបញ្ឈប់ការគាំទ្រ និងធ្វើការរិះគន់រាល់ការលួចចម្លងស្នាដៃនិពន្ធគ្រប់ទម្រង់ ឬអាចចាត់វិធានការតាមផ្លូវច្បាប់ក្នុងករណីចាំបាច់៕