ខេត្តកំពត៖ពស់ថ្លាន់ដ៏ធំទម្ងន់ប្រមាណ៤០គ.ក្រ មួយក្បាលបានលបចូលរឹតសម្លាប់សត្វជ្រូកអ្នកស្រុកងាប់អស់៣ក្បាលកាលពីរំលងអាធ្រាត្រឈានចូលថ្ងៃទី១៦ ខែកញ្ញា ឆ្នាំ២០១៤ នៅក្នុងភូមិអណ្តូងជីម៉ឺន ឃុំកំពង់គ្រែង ស្រុកទឹកឈូ ខេត្តកំពត។
អ្នករាយការណ៍ព័ត៌មានខេត្តកំពតបានឲ្យដឹងថា ក្នុងពេលកើតហេតុ ទាំងម្ចាស់ជ្រូកទាំងអ្នកភូមិមានការភ្ញាក់ផ្អើល និងរន្ធត់ក្រៃលែងព្រោះឃើញសត្វពស់ថ្លាន់នោះវែង ហើយនទំហំធំសម្បើមណាស់ ខណៈដែលវាបញ្ចេញកម្លាំងរឹតរួតសត្វជ្រូកចុងក្រោយ បន្ទាប់ពីវាបានសម្លាប់ជ្រូកពីក្បាលដំបូងដោយគ្មាននរណាដឹងរួចមក។
អ្នកស្រី លាង ស្រីមុំ អាយុ ៣២ឆ្នាំ ជាម្ចាស់ជ្រូកបានប្រាប់ឲ្យដឹងថា សត្វជ្រូកបីក្បាលរបស់គាត់មានទម្ងន់សរុបប្រមាណជិតពីររយគីឡូក្រាម បានងាប់រដូករណែលដោយសារកម្លាំងដ៏ខ្លាំងក្លារបស់ពស់ថ្លាន់នោះ។
អ្នកស្រីបានរំលឹកថា ហេតុការណ៍នោះបានកើតឡើងកាលពីម៉ោងប្រហែលជាង ១ រំលងអាធ្រាត្រ ឈានចូលថ្ងៃទី១៦ ខែកញ្ញា ឆ្នាំ២០១៤ ពេលក្រុមគ្រួសារគាត់កំពុងលង់លក់ក្នុងដំណេកស្ងប់ស្ងាត់ស្រាប់តែឮជ្រូកស្រែកយ៉ាងខ្លាំងក្នុងទ្រុងខាងក្រោយផ្ទះចម្លែកជាងសព្វដង។ ពេលនោះគាត់បានហៅកូនឲ្យចុះទៅមើល ក៏ស្រាប់តែឃើញពស់ថ្លាន់មួយក្បាលយ៉ាងធំកំពុងរឹតជ្រូកក្នុងទ្រុងធ្វើឱ្យកូនគាត់ភ័យតក់ស្លុតញាប់ញ័រស្រែកហៅគាត់ផ្អើលអស់អ្នកជិតខាង។អ្នកភូមិបានមកជួយចាប់ពស់ដោយប្រើពេលអស់យ៉ាងយូរទើបចាប់វាដាក់ចូលបាវបាន។
ប្រភពបន្តថា លុះព្រឹកឡើងទើបគេថ្លឹងពស់ថ្លាន់មួយក្បាលនោះឃើញមានទម្ងន់ ៤០ គីឡូក្រាម។ ពួកគាត់បានកិតថានឹងប្រគល់ពស់ថ្លាន់នោះទៅឲ្យអ្នករក្សាសួនសត្វទឹកឈូ និងសុំលុយខ្លះពីអ្នកឧកញ៉ា ញឹម វណ្ណដា ដើម្បីទិញកូនជ្រូកចិញ្ចឹមឡើងវិញ ព្រោះជ្រូកទាំងនេះគាត់បានខ្ចីលុយពីអង្គការទិញវាមកចិញ្ចឹមជាងបួនខែហើយ ៕រដ្ឋា
រូបថតCEN
