ស្វីស ៖ នៅរសៀលថ្ងៃទី៣ ខែកក្កដា ឆ្នាំ២០១៩នេះ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានទទួលជួបពិភាក្សាការងារជាមួយលោកបណ្ឌិត រតនាកា អាឌីការី (Ratnakar Adhikari) នាយកប្រតិបត្តិនៃក្របខណ្ឌពង្រឹងសមាហរណកម្មពាណិជ្ជកម្ម។

លោកនាយកប្រតិបត្តិបានមានប្រសាសន៍ថា លោកមានការចាប់អារម្ម ណ៍អំពីកំណើនសេដ្ឋកិច្ចកម្ពុជា ដែលទទួលបានក្នុងរង្វង់៧%ក្នុងរយៈពេលជាង២ទសវត្សរ៍នេះ។

លោកនាយកប្រតិបត្តិ បានចូលរួមអបអរសាទរដល់កម្ពុជាដែលរក្សាបានកំណើនសេដ្ឋកិច្ចប្រចាំឆ្នាំរបស់ខ្លួន ហើយនាយកប្រតិបត្តិចង់ដឹងអំពីបទពិសោធន៍របស់ប្រទេសកម្ពុជា។ លោកបានគូសបញ្ជាក់ថា សេដ្ឋកិច្ច៧%កន្លងមកនេះគឺលើសពីទិសដៅអភិវឌ្ឍន៍ចីរភាពដែលបានកំណត់កន្លងទៅនេះ ហើយជាពិសេសទៀត។ កន្លងមកនេះ នៅក្នុងក្របខណ្ឌដែលបានគាំទ្រប្រទេសកម្ពុជាគឺជាប្រទេសទី១ លើយុទ្ធសាស្ត្រសមាហរណកម្មពាណិជ្ជកម្ម ដែលសម្ដេចតេជោបានប្រកាសនៅពេលសម្ដេចថ្លែងនូវសុន្ទរកថាក្នុងកិច្ចប្រជុំត្រួតពិនិត្យឡើងវិញជាសកលលើជំនួយពាណិជ្ជកម្មសម្រាប់ឆ្នាំ២០១៩។

លោកនាយកប្រតិបត្តិបានមានប្រសាសន៍បន្តទៀតថា នេះជាលើកទី៤ហើយ នៃការសិក្សាយុទ្ធសាស្ត្រកាលពីឆ្នាំ២០០៦ ដែលយើងបានផ្ដល់នូវការឧបត្ថម្ភគាំទ្រគាំទ្ររហូតមក។

សម្តេចតេជោបានគួសបញ្ជាក់ថា កម្ពុជានៅមានសក្តានុពលជាច្រើនទៀតក្នុងក្រខណ្ឌអាស៊ានជាពិសេសក្នុងការជំរុញពាណិជ្ជកម្មផ្ទៃក្នុងរបស់អាស៊ាន ដោយសារបច្ចុប្បន្នសេដ្ឋកិច្ចសេរីរវាងអាស៊ាន និងបណ្ដាប្រទេសដែលជាដៃគូសន្ទនារបស់អាស៊ានក៏អាចធ្វើសមាហរណកម្មផងដែរ ហើយសម្ដេចក៏បានស្នើធ្វើយ៉ាងណាឲ្យបន្តជួយប្រទេសកម្ពុជាជាបន្តទៀតក្នុងការធ្វើសមាហរណកម្មពាណិជ្ជកម្មនេះ ហើយមិនត្រឹមតែសម្រាប់ប្រទេសកម្ពុជាទេ ក៏ដូចជាប្រទេសដទៃទៀតផងដែរ៕