ខេត្តរតនគិរីៈបុរសម្នាក់បានស្លាប់ និងស្ត្រី២នាក់រងរបួសធ្ងន់ក្នុងហេតុការណ៍គ្រោះថ្នាក់ចរាចរណ៍រវាងរថយន្តបុកម៉ូតូនៅវេលាម៉ោង៥និង៣០នាទីល្ងាច ថ្ងៃទី២១ ខែមិថុនា ឆ្នាំ២០១៥ ត្រង់ចំណុចទល់មុខហាងក្លឹបកំសាន្ត ស្រីពេជ្រ១៦៨ លើផ្លូវជាតិលេខ៧៨ ស្ថិតក្នុងភូមិឡាបូ សង្កាត់យក្ខឡោម ក្រុងបានលុង ខេត្តរតនគិរី។
សភាពជាក់ស្តែងនៅកន្លែងកើតហេតុអ្នករងគ្រោះទាំង៣នាក់បានដេកស្លាប់ម្នាក់ រងរបួសធ្ងន់២នាក់ ដោយបាក់ជើងធ្វេងទាំងពីរហើយត្រូវគេជួយដឹកទៅមន្ទីរពេទ្យបង្អែកខេត្តដើម្បីជួយសង្គ្រោះបន្ទាន់។ ក្រោយពីកើតហេតុបានបានចំនួន២០នាទី ទើបប៉ូលិសចរាចរណ៍នៃស្នងការដ្ឋាននគរបាលខេត្ត និងប៉ូលិសសង្កាត់យក្ខឡោមបានចុះមកធ្វើការត្រួតពិនិត្យ។
សមត្ថកិច្ចនៅកន្លែងកើតហេតុបានឲ្យដឹងថា ជនរគ្រោះទី១មានឈ្មោះ ឌីវ រ៉េល ភេទប្រុស អាយុ៣៨ឆ្នាំ (ស្លាប់) ទី២ឈ្មោះ រឿន សៀ ភេទស្រី អាយុ២៩ឆ្នាំ (របួសធ្ងន់បាក់ជើងខាងធ្វេង) ទី៣ឈ្មោះ ដូ ដៀ ភេទស្រី អាយុ២២ឆ្នាំ(របួសធ្ងន់បាក់កជើងខាងធ្វេង និងរយះផ្ទៃមុខ)អ្នកទាំង៣មានមុខរបរកម្មករចំការម្រេច មានទីលំនៅភូមិភ្នំ សង្កាត់យក្ខឡោម ក្រុងបានលុង ជនរងគ្រោះទាំង៣ជាជនជាតិភាគតិចទំពួន។
បើតាមសាច់ញាតិជនរងគ្រោះបានឲ្យដឹងថា បងប្អូនគាត់ទាំង៣នាក់ខាងលើមកផ្សារបានលុងដើម្បីទិញអង្ករ និងម្ហូប ដោយជិះម៉ូតូម៉ាក វីវ៉ា ពណ៌ខ្មៅ ពាក់ស្លាកលេខ ភ្នំពេញ1AJ-6212 ។
ទាក់ទិននិងករណីខាងលើសាក្សីដែលឃើញហេតុការណ៍បានអោយដឹងថា នៅមុនពេលកើតហេតុ គេបានឃើញជនរងគ្រោះបើកម៉ូតូមកពីលិចទៅកើត ហើយរថយន្តបានបើកពីកើតទៅលិចបញ្ច្រាសទិសគ្នា លុះមកដល់ចំណុចកើតហេតុរថយន្តបានបើកប្រជែងវ៉ារថយន្តមួយគ្រឿងទៀតបណ្តាលអោយជ្រុលចង្កូតមកខាងធ្វេងដៃហើយបុកម៉ូតូជនរងគ្រោះពេញទំហឹងតែម្តង។
រថយន្តបង្កម៉ាកតាកូម៉ា ពណ៌ទឹកប្រាក់ ពាក់ស្លាកលេខ ភ្នំពេញ2S-8917 ក្រោយពីបង្កហេតុរថយន្តបានបើកបន្ថែមល្បឿនគេចបាត់ស្រមោលតែម្តង។
សូមបញ្ជាក់ផងដែរថា រថយន្តបង្កហេតុត្រូវបានប៉ូលិសចរាចរណ៍តាមចាប់បានខណៈគេបើករត់គេចបានចម្ងាយប្រហែល១គីឡូម៉ែត្រ យកទៅលាក់ទុកនៅក្រោយផ្ទះសំណាក់ ម៉េង លីន មុខបន្ទាយទាហានវរៈ៧៩ ចំណែកអ្នកបើកបររថយន្តបានរត់គេចខ្លួនបាត់។
បច្ចុប្បន្នសមត្ថកិច្ចចរាចរណ៍នៃស្នងការដ្ឋានគរបាលខេត្តបានយកម៉ូតូជនរងគ្រោះទៅរក្សាទុកចំណែកសាកសពប្រគល់ឲ្យសាច់ញាតិធ្វើបុណ្យតាមប្រពៃណី គ្រាន់តែដឹងថា ម្ចាស់រថយន្តជាមន្ត្រីប៉ូលិសវរៈព្រំដែននៅស្រុកអូរយ៉ាដាវ សមត្ថកិច្ចកំពុងស្រាវជ្រាវតាមរកអ្នកបើកបររថយន្តបង្កហរតុដើម្បីយកមកផ្តន្ទាទោសទៅតាមច្បាប់។
លោកហ៊ីង ផានសុគន្ធា ប្រធានមន្ទីរពេទ្យបង្អែកខេត្តបានឲ្យដឹងថា អ្នករបួសទាំង២នាក់មានសភាពធ្ងន់ធ្ងរ មិនអាចព្យាបាលនៅខេត្តបានទេ លោកធ្វើសំណុំបែបបទបញ្ជូនទៅសង្គ្រោះនៅភ្នំពេញ៕ដោយ៖ឡុង សារ៉េត
