ព្រះវិហារ ៖ ប្រជាពលរដ្ឋចំណាកស្រុកម្នាក់ លួចឡើងឆ្លងដែនចូលទឹកដីថៃខុសច្បាប់ ទៅរកស្ពាយ ឈើប្រណិតចេញពីទឹកដីថៃ មកកម្ពុជាតែត្រូវទាហានថៃ បាញ់បណ្តាលឲ្យរងរបួស។

ហេតុការណ៍នេះ បានកើតឡើងកាលពីវេលាម៉ោង ៣.០០នាទី យប់ទាបភ្លឺថ្ងៃសុក្រ ទី២៦ ខែកក្កដា ឆ្នាំ២០១៩ ត្រង់ចំណុចភ្នំដាច់ ស្ថិតនៅក្នុងភូមិសាស្ត្រស្រុកជាំក្សាន្ត ខេត្តព្រះវិហារ។

យោងតាមប្រភពព័ត៌មានមួយដែលភ្នាក់ងារទូទស្សន៍អាស៊ីអាគ្នេយ៍ ប្រចាំខេត្តព្រះវិហារទទួលបាន បានឲ្យដឹងថា ជនរងគ្រោះ មានឈ្មោះ ជឹម យូឡុង ភេទប្រុស អាយុ២៦ឆ្នាំ រងរបួស ដោយសារ សមត្ថកិច្ចថៃបាញ់ ត្រូវចំនួន ១គ្រាប់ចំគូទ ធ្លុះមកភ្លៅខាងឆ្វេង។

ប្រភពបន្តថា បច្ចុប្បន្នជនរងគ្រោះ ត្រូវបានក្រុមគ្រួសារសាច់ញាតិដឹកនាំយកទៅជួយសង្គ្រោះជីវិត យ៉ាងស្ងាត់ៗផងដែរ៕