ភ្នំពេញ ៖ អនុស្សរណៈនៃការយោគយល់គ្នារវាងគណៈកម្មាធិការប្រយុទ្ធប្រឆាំងផលិតផលក្លែងក្លាយ ជាមួយសភាពា ណិជ្ជកម្មអឺរ៉ុបប្រចាំកម្ពុជា ត្រូវបានចុះហត្ថលេខា កាលពីព្រឹកថ្ងៃទី១២ កញ្ញានេះ ដើម្បីបើកផ្លូវឱ្យភាគីទាំងពីរធ្វើកិច្ច សហប្រតិបត្តិការក្នុងការប្រយុទ្ធប្រឆាំងចំពោះការនាំចូល ការផលិត និងការចែកចាយនូវផលិតផលក្លែងក្លាយ នៅ ក្នុងប្រទេសកម្ពុជា។

លោក នាយឧត្តមសេនីយ៍ មៀច សុផាន់ណា រដ្ឋលេខាធិការក្រសួងមហាផ្ទៃ និងជាប្រធានគណៈកម្មាធិ ការប្រយុទ្ធប្រឆាំងផលិតផលក្លែងក្លាយក្នុងពិធីនេះ មានប្រសាសន៍ថា ការចុះអនុស្សរណៈនៃការយោគយល់នាថ្ងៃ នេះ ធ្វើឡើងក្នុងគោលបំណងក្នុងការបង្កើតកិច្ចសហប្រតិបត្តិការក្នុងការទប់ស្កាត់ និងប្រយុទ្ធប្រឆាំងការនាំចូល ការផលិត និងការចែកចាយនូវផលិតផលខូចគុណភាព ផលិតផលហួសកាលបរិវច្ឆេទប្រើប្រាស់ និងផលិតផលបំពាន ច្បាប់ដទៃទៀតនៅកម្ពុជា ដោយនាយឧត្តមសេនីយ៍បានគូសបញ្ជាក់ថា សម្រាប់កិច្ចសហប្រតិបត្តិការនេះ មិនត្រឹម តែផ្តល់អត្ថប្រយោជន៍ដល់អ្នកប្រើប្រាស់ប៉ុណ្ណោះទេ គឺថែមទាំងជាការការពារសុខុមាលភាពប្រជាពលរដ្ឋ និងដើម្បី ការពារអ្នកវិនិយោគសុច្ចរិត និងសហគ្រាសទាំងឡាយដែលប្រកបមុខរបរស្របច្បាប់ លើកទឹកចិត្តការប្រកួតប្រជែង ដោយភាពត្រឹមត្រូវ ដើម្បីរួមចំណែកក្នុងការអភិវឌ្ឍសេដ្ឋកិច្ច និងសង្គមកម្ពុជា។

នាយឧត្តមសេនីយ៍ មៀច សុផាន់ណា បានគូសបញ្ជាក់ថា បញ្ហាឱសថក្លែងក្លាយ ឱសថអន់គុណភាព ការ រក្សាទុក និងការបាត់បង់ប្រសិទ្ធភាពឱសថ បញ្ហាចំណីអាហារខូចគុណភាពដែលមានផ្ទុកសារធាតុគីមីពុល ការលួច ចម្លងផលិតផល ការរំលោភកម្មសិទ្ធិបញ្ហា ក៏ដូចជាគ្រឿងឧបភោគ បរិភោគ និងសម្ភារៈប្រើប្រាស់ក្លែងក្លាយគឺសុទ្ធ សឹងជាបញ្ហា ដែលកំពុងកើតមាន និងបានញាំញី គំរាមកំហែងដល់សុខភាព អាយុជីវិតប្រជាជនក្នុងសង្គមកម្ពុជានា ពេលបច្ចុប្បន្ន ដែលតម្រូវឱ្យមានការចាត់វិធានការក្នុងការបង្កើតជាយន្តការចំរុះ និងធ្វើកិច្ចសហប្រតិបត្តិការទាំង ថ្នាក់តំបន់ និងសកលលោក និងអនុវត្តឱ្យមានប្រសិទ្ធភាពនៃច្បាប់ជាតិ និងសន្ធិសញ្ញាអន្តរជាតិ មានការចូលរួមពី គ្រប់ភាគីពាក់ព័ន្ធ ដើម្បីប្រយុទ្ធប្រឆាំងនឹងសកម្មភាពល្មើសច្បាប់ទាំងនេះឱ្យមានប្រសិទ្ធភាព ដាក់ទោសទណ្ឌដល់ ឧក្រិដ្ឋជនឱ្យបានធ្ងន់ធ្ងរតាមស្ថានភាពទម្ងន់ទោសដែលមានចែងក្នុងច្បាប់ជាដើម៕