ចិន ៖ បានធ្វើតេស្តចុះចតយានមួយកាលពីថ្ងៃទី១៤ ខែវិច្ឆិកា ឆ្នាំ២០១៩ នៅខេត្ត Hebei ក្នុងគោលបំណងបញ្ជូនយានទៅកាន់ភពអង្គារនៅឆ្នាំ២០២០ ដោយអង្គការអវកាសចិនអះអាងថា ចិនកំពុងស្ថិតនៅផ្លូវឆ្ពោះទៅរកបេសកកម្មភពអង្គារនេះហើយ។
ការសាកល្បងចុះចតនេះ ធ្វើឡើងនៅតំបន់ដែលមានលក្ខណៈស្រដៀងទៅហ្នឹងផ្ទៃដីភពអង្គារ ពោលគឺភ្នំតូចៗ ឬទួលដែលពោរពេញដោយថ្ម ដែលធ្វើឱ្យយានអាចយល់ដឹងពីការធ្វើដំណើរឡើងចុះទួលនៅលើភពក្រហមនោះដោយខ្លួនវាបាន។
លោក Zhang Kejian ប្រធានអង្គការអវកាសជាតិចិន បានថ្លែងនៅមុនការធ្វើតេស្តនេះថា៖ «ក្នុងឆ្នាំ២០១៦ ចិន បានចាប់ផ្តើមជាផ្លូវការនូវការងារបេសកកម្មរុករកភពអង្គារ ហើយឥឡូវនេះ គ្រប់ការងារអភិវឌ្ឍន៍ទាំងអស់ កំពុងដំណើរការយ៉ាងរលូនហើយ»។ ទន្ទឹមនោះចិន បានអភិវឌ្ឍគ្រាប់រ៉ុកកែត Long March 5 ដែលមានកម្លាំងខ្លាំងដើម្បីបាញ់បង្ហោះនាំយកយានអវកាសទៅកាន់ភពអង្គារ។
បើតាមលោក Zhang Rongqiao ប្រធានស្ថាបត្យករនៃកម្មវិធីរុករកភពអង្គារ ឱ្យដឹងថា ការបាញ់បង្ហោះពីផែនដី ទៅភពអង្គារ ត្រូវប្រើពេល ៧ខែ ចំណែកឯការចុះចតលើផ្ទៃដីភពអង្គារ ប្រើពេលត្រឹម ៧នាទីប៉ុណ្ណោះ។
គួររំលឹកថា កាលពីខែមករា ឆ្នាំ២០១៩ ចិនបានសម្រេចជោគជ័យលើកដំបូងជាប្រវត្តិសាស្រ្ត ក្នុងការចុះចតយានមួយឈ្មោះ Chang’e-4 នៅលើផ្នែកម្ខាងទៀតនៃភពព្រះចន្ទ (តំបន់ងងឹតដែលមនុស្សលើផែនដីមិនអាចមើលឃើញ និងជាតំបន់ដែលមិនទាន់មានប្រទេសណាបញ្ជូនយានអវកាសទៅដល់)៕
