កូរ៉េខាងជើង ៖ កូរ៉េខាងជើងបាននិយាយថា ខ្លួនមិនចាប់អារម្មណ៍នឹងការជួបពិភាក្សាបន្តទៀតជាមួយសហរដ្ឋអាមេរិក រយៈពេល ១ថ្ងៃបន្ទាប់ពីប្រធានាធិបតី Donald Trump បានសរសេរសារនៅលើបណ្ដាញសង្គម Twitter ផ្ញើទៅកាន់មេដឹកនាំប្រទេសនេះកាលពីថ្ងៃអាទិត្យ ដោយនិយាយថាជួបគ្នាឆាប់ៗ។
សេចក្ដីថ្លែងការណ៍ពីទីប្រឹក្សាក្រសួងការបរទេសកូរ៉េខាងជើងលោក Kim Kye Gwan ដែលចុះផ្សាយដោយទីភ្នាក់ងារសារព័ត៌មាន KCNA បាននិយាយថា ខ្ញុំបានបកប្រែ Twitter របស់ប្រធានាធិបតី Trump នៅថ្ងៃទី១៧ ដើម្បីបញ្ជាក់កិច្ចប្រជុំកំពូលថ្មីរវាងកូរ៉េខាងជើង និងអាមេរិក ប៉ុន្តែយើងលែងចាប់អារម្មណ៍នឹងកិច្ចប្រជុំទាំងនោះទៀតហើយ ព្រោះថា វាគ្មានប្រយោជន៍សោះសម្រាប់យើង។ លោកKim បានលើកឡើងថា សហរដ្ឋអាមេរិកកំពុងព្យាយាមបង្ហាញពីរូបភាព នៃភាពជឿនលឿនក្នុងបញ្ហាឧបទ្វីបកូរ៉េ ប៉ុន្តែវាជាយុទ្ធសាស្ត្រពន្យារពេលប៉ុណ្ណោះ។
លោក Kim បាននិយាយថា យើងនឹងមិនផ្ដល់អ្វីដល់ប្រធានាធិបតីអាមេរិក ដើម្បីអួតខ្លួនទាំងដែលខ្លួនពុំបានផ្ដល់អ្វីជាថ្នូរត្រឡប់មកវិញនោះឡើយ ហើយយើងត្រូវតែទទួលបានពីសហរដ្ឋអាមេរិក នូវអ្វីដែលស្របទៅនឹងលទ្ធផលដែលលោកប្រធានាធិបតី Trump កំពុងអួតអាងថា ជាសមិទ្ធផលរបស់លោកនោះ៕
